Toqaev Jergilikti qamtý jónindegi óńirlik komıssııalardyń jumysyn synady
«Infraqurylymdyq memlekettik baǵdarlamalar aıasynda ákimder men mınıstrler jergilikti qamtý úlesin 90 paıyzǵa deıin jetkizý mindettemesin alǵan. Jyl saıyn bul memlekettik baǵdarlamalardy qarjylandyrý kólemi shamamen 2,8 trln teńgeni quraıdy. ıAǵnı, bizdiń ekonomıkamyzǵa 2,5 trln teńge quıylýy tıis», - dep atap ótti QR Prezıdenti.
Osy oraıda Memleket basshysy is júzinde mundaı jaıt kórinis bermeı otyrǵanyn synady.
«Josparlaýdyń, eseptilik pen esepke alýdyń biryńǵaı júıesi joq. Memlekettik organdar men bas merdigerlerdiń qatań jaýapkershiligi de is júzinde bolmaı otyr. Jergilikti qamtý jónindegi óńirlik komıssııalardyń jumysy «túrtip qoıý» úshin ǵana júrgiziledi», - dedi Qasym-Jomart Toqaev.
Aıta keteıik, vıdeobaılanys arqyly ótip jatqan jıynda Úkimet 2020 jyldyń alǵashqy jarty jyldyǵyndaǵy elimizdiń áleýmettik-ekonomıkalyq damý qorytyndysy týraly esep berdi. Sondaı-aq koronavırýsqa qarsy kúreske qatysty qabyldanǵan sharalar, Memleket basshysynyń Úkimettiń aldaǵy ýaqytta atqaratyn jumysynyń negizgi baǵyttary boıynsha bergen tapsyrmalary men mindetteri qarastyryldy.
Elimizdiń áleýmettik-ekonomıkalyq damýynyń qorytyndylary men jyl sońyna deıin oryndaıtyn mindetter jóninde Premer-Mınıstr Asqar Mamın, aqsha-nesıe saıasatyna qatysty sharalar týraly Ulttyq banktiń tóraǵasy Erbolat Dosaev, elimizdegi epıdemıologııalyq ahýaldy jaqsartý jónindegi sharalar týraly Densaýlyq saqtaý mınıstri Alekseı Tsoı baıandama jasady.
