Toqaev jastarǵa úndeý jasady: referendýmda tańdaýyńdy jasaý — týǵan eldiń jarqyn bolashaǵyn óz qolyńmen qurý degen sóz
ASTANA. KAZINFORM — Memleket basshysy Qasym-Jomart Toqaevtyń qatysýymen barlyq deńgeıdegi máslıhat depýtattarynyń ІІІ respýblıkalyq forýmynda jas otandastarymyzǵa qarata arnaıy úndeý jasady.
— Táýelsizdik jyldary ishinde Qazaqstan aıtylǵan barlyq teris boljamdarǵa qaramastan, halqymyzdyń tabandy eńbeginiń arqasynda halyqaralyq abyroı-bedeli zor kúshti memleket retinde qalyptasty. Biraq, kúshti, myqty el bolý jetkiliksiz. Memlekettiń shynaıy kemeldigi azamattardyń, zań men óskeleń urpaqtyń aldyndaǵy jaýapkershiliginen aıqyn kórinedi.
Myqty memleket tirek bolady, al jaýapty memleket erteńgi kúnge degen senimdi kúsheıtedi. Kúsh pen jaýapkershilik úılesim tapqanda ǵana memleket ozyq ári qarqyndy damý jolyna túsedi. Keıingi urpaq bizdiń olqylyqtarymyzǵa túsinistikpen qaraýy múmkin, biraq el taǵdyryna áser etetin tarıhı sheshim qabyldaý kezinde enjar, jigersiz, jaýapsyz bolsaq, olar bizdi eshqashan keshirmeıtini sózsiz. Dál qazir bizdiń aldymyzda kemel sanamen, zor jaýapkershilikpen taǵdyrly tańdaý jasaý mindeti tur, — dedi Qasym-Jomart Toqaev.
Prezıdent «Jańa Konstıtýtsııa jobasy, eń aldymen, Sizderge arnalǵan» dedi.
— Sizderge referendýmda daýys berip, Otanymyzdyń taǵdyryna qatysyńyz bar ekenińizdi bildiretin oraıly múmkindik berildi. Basqasha aıtqanda, Sizder Ata zańǵa úles qosqan azamattar retinde el tarıhyna óz esimderińizdi jazyp qaldyra alasyzdar. Biraz ýaqyt ótken soń, ómir kórip, eseıgen shaǵyńyzda: «Men azamattyq paryzymdy oryndadym. Elimniń jańa Ata zańyn qabyldaýǵa óz úlesimdi qostym» dep maqtanyshpen aıtýǵa tolyq quqyńyz bar.
Qymbatty otandastar! Sizderdiń tańdaýlaryńyz — bıýlleten qaǵazyndaǵy jaı ǵana belgi emes. Ol — jańa Halyq Konstıtýtsııasy jobasyna kórsetilgen naqty qoldaýyńyz. Qazaqstandy damýdyń dańǵyl jolyna salýǵa jastar atsalysady.
Kúni erteń yntymaq-birligi jarasqan, eńbekqor, zańǵa baǵynatyn, bilim, ǵylym, mádenıet jáne zaıyrlylyq qundylyqtary berik ornyqqan, jappaı tsıfrlandyrý men jasandy ıntellekt kúndelikti ómirdiń ajyramas bólshegine aınalatyn qoǵam qurý mıssııasy Sizderge júkteledi.
Sizdiń daýysyńyz naǵyz jasampaz otanshyldyqtyń, azamat retinde el keleshegi úshin jaýapkershilik arqalaýdyń qandaı bolatynyn kórsetedi, — dedi Memleket basshysy.
Prezıdent elimizdiń aýmaqtyq tutastyǵy men memlekettik qurylymy myzǵymas sıpatqa ıe ekenin aıtty.