Qasym-Jomart Toqaev Sadyr Japarovtyń qyrǵyz memlekettiligin nyǵaıtý sheshimderin qýattady

ASTANA. KAZINFORM – Memleket basshysy Qyrǵyzstan Prezıdentimen telefon arqyly sóılesti.

Qazaqstan Prezıdenti qazaq-qyrǵyz qarym-qatynasynyń oń dınamıkasyna toqtalyp, oǵan turaqty saıası dıalog, eki el úkimetteri men isker toptary arasyndaǵy belsendi yqpaldastyq septigin tıgizip otyrǵanyn atap ótti.

Baýyrlas elderdiń kóshbasshylary saýda-ekonomıka, kólik-logıstıka jáne sý-energetıka salalaryndaǵy yntymaqtastyqtyń qarqyndy túrde damyp kele jatqanyna nazar aýdardy.

Prezıdentter dostyq, strategııalyq seriktestik pen odaqtastyq rýhyndaǵy memleketaralyq baılanystardy odan ári keńeıtýge beıil ekenin rastady.

Qasym-Jomart Toqaev Sadyr Japarovqa elimizde Konstıtýtsııalyq reforma júrgizilip jatqanyn aıtty. Bul jańǵyrtý memlekettiń qaryshtap órkendeýine negiz qalaıdy. Qyrǵyzstan Prezıdenti Qazaqstandaǵy aýqymdy ózgeristerdi qoldaıtynyn málimdedi.

Memleketter basshylary óńirlik yntymaqtastyq máseleleri jóninde ortaq pikirde ekenin jetkizdi.

Qazaqstan Prezıdenti Bishkekte ShYU sammıti men Dúnıejúzilik kóshpendiler oıyndary sekildi mańyzdy halyqaralyq is-sharalardyń tabysty ótýine tilektestik bildirdi.

Qasym-Jomart Toqaev Sadyr Japarovtyń el birligin saqtaýǵa, qyrǵyz memlekettiligin nyǵaıtýǵa baǵyttalǵan sheshimderin qýattady.

Aıta keteıik, Memleket basshysy QHR Tóraǵasyna quttyqtaý jedelhatyn joldady.