Toqaev: Jańa munaı-gaz ken oryndaryn zertteýge kirisý qajet

QYZYLORDA. QazAqparat - Qazaqstanda munaı men gazdyń jańa ken oryndaryn zertteý qajet. Bul jaıynda Qazaqstan Prezıdenti Qasym-Jomart Toqaev málim etti, dep habarlaıdy QazAqparat tilshisi Aqordanyń Twitter-degi akkaýntyna silteme jasap.

«Qazir óńirdegi munaı-ken oryndarynyń sarqylýy jáne jyl saıyn kómirsýtek óndirýdiń tómendeýi baıqalady. Bolashaqta bul salada jumys isteıtin adamdarda problema týyndaýy múmkin. Resýrstyq bazasyn keńeıtý boıynsha shuǵyl sharalar qajet», - dedi Qasym-Jomart Toqaev Qyzylorda oblysynyń jurtshylyǵymen kezdesý barysynda.

Osy oraıda Memleket basshysy jańa munaı-gaz ken oryndaryn zertteýge kirisý qajettigine nazar aýdartty.

«Jańa ken oryndaryn zertteýge, qoldanystaǵy jobalarǵa zamanaýı tehnologııalardy engizýge kirisý qajet. Úkimet «QazMunaıGaz» ulttyq kompanııasy jáne ákimdikpen birlesip, óńirdegi munaı-gaz salasyn damytýdyń naqty strategııasyn ázirleýi kerek», - dedi Qazaqstan Prezıdenti.

Eske salaıyq, búgin Memleket basshysy jumys saparymen Qyzylorda oblysyna keldi. Onda oblystyq kópbeıindi balalar aýrýhanasyna jáne «Jan-Araı» JShS-ǵa bardy.Sondaı-aq qalanyń sol jaǵalaýynda paıdalanýǵa berilgen nysandarmen tanysty.