Toqaev: Jańa Konstıtýtsııa elimizdiń ornyqty damýyna berik negiz qalady
ASTANA. KAZINFORM – Memleket basshysy Qasym-Jomart Toqaevtyń aıtýynsha, qazirgi jahandyq syn-qaterlerge jaýap retinde Qazaqstanda sońǵy jyldary aýqymdy saıası jáne ekonomıkalyq reformalar júrgizildi.
— 1 shilde kúni kúshine engen jańa Konstıtýtsııa elimizdiń ornyqty damýyna berik negiz qalady. Ata zań erejeleri jańa memlekettik basqarý júıesin qalyptastyrdy. Bul ózgerister áleýmettik-ekonomıkalyq turaqtylyqty nyǵaıtýǵa, sondaı-aq Ádiletti, Ozyq Qazaqstandy qurýǵa baǵyttalǵan. Jańa zań shyǵarýshy organ — bir palataly Quryltaı qyzmetine kiristi, — dedi ol.
Qasym-Jomart Toqaev reformalardyń tabysty júzege asýyna jáne Quryltaı saılaýyna oraı jyly lebizin joldaǵan memleketter basshylaryna alǵys aıtty.
Sondaı-aq Qazaqstan teńgerimdi, syndarly ári beıbit syrtqy saıasattan eshqashan aınymaıtynyn rastady.
Budan keıin Prezıdent Birikken Ulttar Uıymynyń qyzmetin odan ári jetildirýge qatysty pikir bildirdi.
— BUU atyna jıi syn aıtylady. Keıbir syn oryndy bolsa da, báribir bul Uıymnyń balamasy joq. Ony nyǵaıtý, tıimdiligin arttyrý — ortaq mindetimiz. BUU-nyń aımaqtyq qurylymdarmen, sonyń ishinde ShYU-men tyǵyz yqpaldastyǵy osy maqsatqa saı keledi. Qazaqstan Birikken Ulttar Uıymy halyqaralyq júıeniń ózegi, al onyń Jarǵysy halyqaralyq quqyqtyń ámbebap negizi bolyp qalýǵa tıis dep sanaıdy, — dedi Prezıdent.
Osyǵan deıin Toqaev Eýrazııanyń zamanaýı kólik-logıstıkalyq qańqasyn qurý isin jedeldetýdi usyndy.
