Toqaev Jambyl oblysyndaǵy júgeri óńdeý zaýytyn iske qosý rásimine qatysty
ASTANA. KAZINFORM — Qasym-Jomart Toqaev «Qazaqstan — Qytaı» ınvestıtsııalyq forýmy aıasynda beınebaılanys rejımi arqyly Jambyl oblysynda júgerini tereń óńdeý boıynsha ónerkásip parki qurylysyn bastaýǵa ruqsat berdi.
Aqordanyń habarlaýynsha, jobany álemdegi bıologııalyq ashytý salasy kóshbasshylarynyń biri — qytaılyq Fufeng Group kompanııasy iske asyrady. Óndiristik keshendi ınvestıtsııalaýdyń alǵashqy kezeńine 350 mıllıon dollar jumsaldy. Kásiporyn jylyna 500 myń tonnaǵa deıin júgeri óńdeı alady.
Ekinshi kezeńde kásiporynnyń júgeri óńdeý qýatyn jylyna 3 mıllıon tonnaǵa deıin ulǵaıtý jáne shyǵarylatyn ónim túrlerin arttyrý qarastyrylǵan. Bul kezeńdegi ınvestıtsııanyń jalpy kólemi 1,15 mıllıard dollar bolady.
— Ónerkásip parkin qurý 1,5 myńǵa jýyq jumys ornyn ashýǵa jáne elimizde júgeri dánin tereń óńdeý boıynsha tolyq óndiristik tsıkldi qalyptastyrýǵa múmkindik beredi, — delingen habarlamada.
Sonymen qatar aýyl sharýashylyǵy shıkizatyn tereń óńdeýdi ilgeriletýge, Qytaımen ónerkásiptik yntymaqtastyqty keńeıtýge, sondaı-aq otandyq agroónerkásip salasynyń eksporttyq áleýetin nyǵaıtýǵa septigin tıgizedi.
Eske salaıyq, munyń aldynda Qasym-Jomart Toqaev Qazaqstan men Qytaıdyń saýda aınalymyn 100 mlrd dollarǵa jetkizý kózdelip otyrǵanyn aıtqan edi.
