Toqaev: Zań aldynda báriniń teń bolýy – memleketimizdiń uzaq merzimdi damýynyń negizgi sharty
ASTANA. QazAqparat – Zań aldynda báriniń teń bolýy – memleketimizdiń uzaq merzimdi damýynyń negizgi sharty. Bul týraly QR Prezıdenti Qasym-Jomart Toqaev saltanatty ulyqtaý rásiminde aıtty, dep habarlaıdy QazAqparat tilshisi.
«Shynaıy zań ústemdigin qamtamasyz etpeı, ádiletti ári naryqtyq ekonomıkany qurý, jeke menshikti qorǵaý, básekelestikti damytý, sybaılas jemqorlyqty joıý múmkin emes. Sondyqtan zań aldynda báriniń teń bolýy – memleketimizdiń uzaq merzimdi damýynyń negizgi sharty. Barlyq másele, ásirese túıtkildi jáne daýly problemalar konstrýktıvti dıalog arqyly, eń aldymen, Parlamentte sheshilýge tıis. Aldaǵy Senat jáne Májilis saılaýy osy múmkindikti beredi», - dedi Qasym-Jomart Toqaev.
Memleket basshysy «túrli kózqaras, biraq birtutas ult» qaǵıdatyn qatań saqtaýymyz kerektigin basa atap ótti.
«Biz «birligimiz – áralýandyqta» formýlasynda kórinis tapqan halqymyzdyń tarıhı jetistikterin jan-jaqty eseleýge tıispiz. Qoǵamda arazdyq týǵyzatyn jáne ulttyń birligin buzatyn, túptep kelgende, memleketimizge qarsy baǵyttalǵan arandatýshylyq áreketterge qatań tosqaýyl qoıylady», - dedi QR Prezıdenti.
