Toqaev Ústel tennısi federatsııasynyń prezıdenti boldy

Bul týraly búgin Astanada federatsııanyń kezekten tys ótken baspasóz otyrysynda belgili boldy.

Bul laýazymda Qasym-Jomart Toqaevtyń aldynda Baqtyqoja Іzmuhambetov bolǵan edi. Odan basqa, federatsııanyń basshylyq organy saılanyp, Danııar Ábilǵazın Bas hatshy boldy.

«Nátıjeli jumysqa jáne maǵan kórsetilgen senimge oraı men Konferentsııaǵa qatysýshylarǵa alǵys bildiremin. Bizdiń aldymyzda tórt jyldyq jańa kezeń bastaldy. 2020 jyly Tokıoda ótetin Olımpıadadaǵy mańyzdy jarystarda synǵa túsetin bolamyz. Ústel tennısindegi nátıjelerdi jaqsartý jónindegi kúrdeli de qıyn joldardy birge baǵyndyramyz. Sondyqtan aımaqtardaǵy materıaldyq-tehnıkalyq bazany nyǵaıtý jáne aımaqtyq federatsııany damytý, jattyqtyrýshylar quramynyń biliktiligin arttyrý, bizdiń sportshylardy sapaly jattyǵý jaǵdaılarymen qamtamasyz etý, halyqaralyq yntymaqtastyqty damytý jáne ústel tennısinen álemdik sport arenasynda Qazaqstan ornyn kúsheıtý qajet dep sanaımyn. Federatsııanyń basty mindetteriniń biri - ústel tennısiniń elimizde keńinen qanat jaıýyn qamtamasyz etý, sporttyń osy túrine buqaralyq sıpat berý bolyp tabylady. Sondaı-aq ústel tennısin damytý salasynda ozyq tájirıbelermen almasýdy uıymdastyrý da mańyzdy», - dep atap ótti Q.Toqaev.



Sondaı-aq Qazaqstan Respýblıkasy Mádenıet jáne sport mınıstri Arystanbek Muhamedıuly Qazaqstan Respýblıkasynyń ústel tennısi federatsııasynyń esep berý-saılaý konferentsııasynyń ashylýymen quttyqtaı otyryp: «Búgin tórt jyldyq kezeńdegi federatsııanyń jumys qorytyndysyna kýá bolyp otyrmyz. Qazaqstanda ústel tennısi asa tanymal sport túri bolyp tabylatynyn atap ótken jón. Osy sport túrimen júıeli aınalysatyndardyń sany 147 myń adamdy quraıdy. Sport mektepteri men dene shynyqtyrý ujymdarynda 2582 jattyqtyrýshy eńbek etedi. Táýelsizdik jyldarynda tuńǵysh ret Kırıll Gerasımenko 2016 jylǵy Olımpıada oıyndaryna lıtsenzııa jeńip aldy. Biz barlyǵymyzdyń kúshimizben álemdik qoǵamdastyqta joǵary nátıjege jetemiz dep senemiz jáne de aldaǵy Olımpıada oıyndarynda ústel tennısinen bizdiń qurama barlyq úmitti aqtaıdy dep senemiz», dep atap ótti.  

Konferentsııaǵa qatysýshylar Qazaqstandaǵy osy sport túrin damytýdyń qazirgi kezdegi ózekti máselelerin talqylady. Sondaı-aq konferentsııada federatsııanyń atqarý komıtetiniń jańa quramy bekitildi.

Esterińizge sala keteıik, bıyl Qazaqstan ústel tennısinen tuńǵysh ret Olımpıada oıyndaryna joldama jeńip alǵan bolatyn. Rıo-de-Janeıroda Qazaqstan atynan Kırıll Gerasımenko saıysqa túsken. Alaıda, júldeli oryndardan kórine almady.