Toqaev: Ustazdyq etken ár adamnyń eńbegi zor qurmetke laıyq
ASTANA. KAZINFORM — Bul týraly Memleket basshysy muǵalimderdi kásibı merekesimen quttyqtaý barysynda aıtty.
Prezıdent kózi ashyq, kókiregi oıaý, tárbıeli, zańǵa baǵynatyn adal azamattar eń aldymen mekteptegi muǵalimnen tálim alatyny aıtty.
Sonymen qatar Memleket basshysy eńbekqor, bilimge qushtar, izdenimpaz urpaq tárbıeleýdiń mańyzyna toqtaldy.
– Biz balalardyń qyzyǵýshylyqtary men qajettilikterin eskerýge, olardy shynaıy ómirde de, vırtýaldy keńistikte de qorǵaýǵa mindettimiz. Eń bastysy – óskeleń urpaqqa asa qajetti dúnıemen, atap aıtqanda, jarqyn keleshekpen, naqty múmkindiktermen qamtamasyz etip, olarǵa eseıgende maqsat-muratyna jetýge yntalandyratyndaı jaǵdaı jasaý. Eńbeksiz eshqandaı tabys ta, jetistik te bolmaıdy. Bul – ómirdiń qaǵıdasy, zańy. Eńbek degenimiz – búkil ómirdi bılep turǵan patsha, bul – ómirdiń arqaýy. Ómir, bul – ǵajapqa toly sıqyrly álem emes. Ómir jolyn tek jan-jaqty daıyndalǵan, bilimmen qarýlanǵan adam ǵana eńsere alady. Osy qarapaıym túsinikti balalarǵa túsindirip aıtý mańyzdy. Strategııalyq maqsatymyz – bıik shyńdarǵa kóz tigetin, básekeden taısalmaıtyn jasampaz urpaq tárbıeleý. Qazaqstannyń ósip-órkendeýi árqaısymyzdyń qanshalyqty úles qosatynymyzǵa baılanysty, – dedi Qasym-Jomart Toqaev.
Prezıdent sózin túıindeı kele, qazir halqymyzdyń dúnıetanymy ózgerip, qoǵamymyzda jańa etıka qalyptasyp kele jatqanyna nazar aýdardy.
– Tazalyq, eńbekqorlyq, adaldyq, ózara syılastyq qasıetteri ulttyq daǵdymyzǵa aınalyp jatyr. «Taza Qazaqstan» aktsııasy jalpyulttyq sıpat alyp, elimizdiń kelbetine jáne eń bastysy, azamattarymyzdyń bolmysyna oń áser ete bastady. Tabıǵatty aıalaý, joǵary ekologııalyq mádenıetti qalyptastyrý memleketimizdiń konstıtýtsııalyq mindeti sanalady. Osyndaı eldik mańyzy zor iske sizder, jalpy ustazdar qaýymy mol úles qosyp jatsyzdar. Sebebi kózi ashyq, kókiregi oıaý, tárbıeli, zańǵa baǵynatyn adal azamattar eń aldymen mekteptegi muǵalimnen tálim alady. Sondyqtan men elimizdegi barsha ustazǵa shynaıy rızashylyǵymdy bildiremin. Ustazdyq etken ár adamnyń eren eńbegi zor qurmetke laıyq dep sanaımyn,– dedi Memleket basshysy.
Aıta ketelik Memleket basshysy muǵalimderdi kásibı merekesimen quttyqtady.
