Toqaev: Ulttyq qor Úkimetti bosańsytyp otyr

ASTANA. QazAqparat - Úkimet Ulttyq qor qarjysyna qatty senip ketti. Bul týraly «Teńdestirilgen jáne ashyq bıýdjet - eldiń tabysty jáne ornyqty áleýmettik-ekonomıkalyq damýynyń kepili» atty parlamenttik tyńdaýda Senat tóraǵasy Qasym-Jomart Toqaev málim etti, dep habarlaıdy QazAqparat.

Ulttyq qor qarjysyn paıdalaný máslesine erekshe nazar aýdarý kerektigine toqtalǵan Senat tóraǵasy, «birqatar sarapshylardyń paıymynsha, Ulttyq qor qarjysyn paıdalanýdyń qazirgi tájirıbesi uzaq merzimdi perspektıvada Úkimettiń ekonomıkalyq saıasaty tıimdiliginiń tómendeýine alyp kelýi múmkin. Buǵan aǵymdaǵy problemalardy jedel sheshý úshin turaqty qarjy kóziniń bolýy (Ulttyq qordan) yqpal etýde. Basqasha aıtqanda, Ulttyq qor Úkimetti bosańsytyp otyr», - dedi.

Spıkerdiń sózine qaraǵanda, qazirgi kezde respýblıkalyq bıýdjettiń 46 paıyzyn Ulttyq qordan keletin transfertter quraıdy. Bul óz kezeginde bıýdjettiń munaıdan túsetin qarjyǵa aıtarlyqtaı táýeldiligin baıqatýda.

«Biz ekonomıkany basqa jaǵdaılarda damytýǵa daǵdylanýymyz kerek. Osy oraıda ekonomıkalyq ósimniń jańa modelin quryp, básekelestik pen naryq jaǵdaılarynda ómir súrýge úırenýimiz qajet. Bul strategııalyq maqsatqa Prezıdenttiń Úshinshi jańǵyrýy negizdelgen», - dedi Toqaev.