Toqaev Ulttyq kásipkerler palatasyn transformatsııalaýdy tapsyrdy
«Sonymen qatar kelesi jaıtqa aıryqsha nazar aýdarý kerek. Keıde bıznesti kásipkerlikpen aınalysý úshin emes, memlekettik qoldaýǵa ıe bolý maqsatynda quratyn jaǵdaılar kezdesedi. Nátıjesinde memlekettik qoldaý sharalarynyń ekonomıkalyq qaıtarymy jumsalǵan bıýdjet qarjysynyń kólemine saı kelmeıdi. 2015-2021 jyldary bıznesti memlekettik qoldaý kólemi (7 trln teńge) qoldaýǵa ıe bolǵan kompanııalardan túsken salyq túsimderiniń somasynan 1,5 ese asyp tústi (4,5 trln teńge). Mundaı jaǵdaı jyl saıyn qaıtalanady. Bıznesti yntalandyrý tásilderin ózgertýge baǵyttalǵan buǵan deıingi áreketter sátsiz boldy. Osyǵan baılanysty Úkimetke qoldaý sharalaryna qatysty tetikterdi sapaly túrde jańǵyrtýdy tapsyramyn», - dedi Qasym-Jomart Toqaev.
Onyń aıtýynsha, qoldaý sharalaryna ıe bolǵandardyń biryńǵaı ashyq reestrin qurý máselesin pysyqtaý qajet.
Bul biryńǵaı aqparattyq júıede barlyq málimet jınaqtalady.
Bul kásiporyndardyń az bóligine ǵana qarjynyń shamadan tys bólinýin boldyrmaýǵa, sondaı-aq memlekettik kómektiń tıimdiligin obektıvti ári jedel baǵalaýǵa múmkindik beredi.
Bul rette Qasym-Jomart Toqaevtyń sózine qaraǵanda qoldaý sharalarynyń tıimdiligin tólengen salyq kólemin ulǵaıtý, jańa sapaly jumys oryndaryn ashý jáne ónimniń el ishindegi qundylyǵyn arttyrý, eksporttyq áleýetti damytý negizinde baǵalaý qajet.
Memlekettik qoldaý sharalaryn avtomattandyrý jáne onyń tıimdiligin baǵalaýdyń shynaıylyǵyn qamtamasyz etý úshin Úkimet tsıfrlyq tehnologııalardy belsendi túrde engizip, sheshim qabyldaý protsesterin avtomattandyrýy qajet.
«Qoryta kele, Ulttyq kásipkerler palatasy qyzmetine qatysty máselelerge arnaıy toqtalǵym keledi. Onyń negizgi mindeti – bıznes pen memleket arasyndaǵy tıimdi dıalogtyń negizgi ózegi bolý. Palatany transformatsııalaý, ony korporatıvtik basqarý sapasyn aıtarlyqtaı arttyrý qajet. Palata kásipkerlerdiń ortaq pikirin tolyq jetkizip, áleýmettik-ekonomıkalyq reformalardy ilgeriletetin uıym bolýǵa tıis», - dep túıindedi Qasym-Jomart Toqaev.
Jıynda Ulttyq ekonomıka mınıstri Álibek Qýantyrov, Bas prokýror Berik Asylov, «Atameken» UKP tóralqasynyń tóraǵasy Raıymbek Batalov, Kásipkerlerdiń quqyqtaryn qorǵaý jónindegi ýákil Rýstam Júrsinov, «Rıdder taý-ken shahta jabdyǵy zaýyty» JShS quryltaıshysy Andreı Pechenın, «Qaıyp ata» JShS bas dırektory Syrym Ertaev, «Kazdream» IT holdınginiń negizin qalaýshy jáne basshysy Dáýren Tólebaev, «Orient Finance Group» JShS aktsıoneri Rýslan Shaekın sóz sóıledi.
