Toqaev Ulttyq mamandyqtar transformatsııasy ortalyǵyn qurýdy tapsyrdy

ASTANA. KAZINFORM — Bilim salasynda qarjyny júıeli jumsaý úderisin jalǵastyrǵan jón. Bul týraly Úkimettiń keńeıtilgen otyrysynda Memleket basshysy Qasym-Jomart Toqaev málim etti.

— Bilim salasynda birqatar júıelik problema bar ekenin Ulttyq quryltaı otyrysynda aıttym. Olar jekemenshik bilim berý uıymdaryn qoldaýǵa da, memlekettiń mektepter men joǵary oqý oryndaryn qarjylandyrý tetikterine de qatysty. Bilim salasyndaǵy «ekonomızatsııa», ıaǵnı qarjyny tekke shashpaı, júıeli jumsaý úderisin jalǵastyrǵan jón. Bul rette balabaqshadan bastap ýnıversıtetterge deıingi barlyq deńgeıde memlekettik qarjylandyrýdyń tıimdiligin túbegeıli arttyrýǵa basa mán berý qajet. Maman daıarlaý isi ekonomıkanyń naqty sektorlarynda jasandy ıntellekti men jańa tehnologııalardy ıgerý qarqynyna ilese almaı otyr. Oqý baǵdarlamalary men standarttary jańaryp úlgergenshe, mamandyqtar ózgerip ketip jatyr. Demek jaı ǵana IT-mamandardyń sanyn kóbeıtý jáne jalpy tsıfrlyq daǵdylardy úıretý jetkiliksiz, — dedi Qasym-Jomart Toqaev.

Prezıdenttiń aıtýynsha, elimizge jasandy ıntellektti kez kelgen salada qoldana biletin kásibı mamandar qajet. Olar naqty jumys oryndaryndaǵy eńbek ónimdiligin arttyrady.

— Osyǵan oraı Úkimetke jetekshi kompanııalarmen birlesip, memleket pen jeke seriktestik negizinde Ulttyq mamandyqtar transformatsııasy ortalyǵyn qurýdy tapsyramyn. Ol ortalyqty memlekettik emes kompanııalardyń konsortsıýmy basqarǵany durys. Óıtkeni bıznes tezirek beıimdeledi ári naryq talaptaryn jaqsy biledi. Óz kezeginde, Úkimet erejelerdi aıqyndap, ashyqtyq pen suranysty qamtamasyz etýge, tıimdi sheshimderdi jappaı taratýǵa kómektese alady, — dedi Memleket basshysy.

Budan buryn habarlanǵandaı, Prezıdent Ata Zańymyzǵa qatysty túpkilikti sheshim jalpyulttyq referendýmda qabyldanatynyn málim etti.