Toqaev: Úkimetten bastap aýyl ákimderine deıingi basqarý qurylymyn qaıta qaraý qajet
ASTANA. KAZINFORM — Memlekettik mekemelerdi utymdy bastama kóterýge, derbes sheshim qabyldaýǵa yntalandyrý qajet. Bul týraly Qazaqstan halqyna Joldaýyn jarııalaý kezinde Prezıdent Qasym-Jomart Toqaev málim etti.
— Biraq bul aýqymdy jumysty memlekettik basqarý júıesin reformalaý isinen bastaýymyz kerek. Konstıtýtsııa zańdy kúshine engen soń elimizdiń saıası júıesi tolyq jańǵyrdy. Osyǵan baılanysty memlekettik mekemeler aldynda turǵan mindetter de kúrdelene tústi. Qazir bılik júıesin damytýdyń jańa strategııasyna sáıkes osy salany túbegeıli reformalaý qajettigi týyndap otyr, — dedi Qasym-Jomart Toqaev.
Prezıdenttiń aıtýynsha, bul úderiste tutas memlekettik apparattyń jáne árbir memlekettik qyzmetshiniń jumys tıimdiligin arttyrý mańyzdy mindet bolýǵa tıis.
— Eń aldymen, Úkimetten bastap aýyl ákimderine deıingi barlyq deńgeıdegi basqarý qurylymyn qaıta qaraý qajet. Bılik júıesi tsıfrlandyrý dáýiriniń talaptaryna saı jumys istep, jasandy ıntellektiniń múmkindikterin tıimdi paıdalana bilýi kerek. Memlekettik mekemelerdi utymdy bastama kóterýge, derbes sheshim qabyldaýǵa yntalandyrý qajet, — dedi Memleket basshysy.
Buǵan deıin Prezıdent Qasym-Jomart Toqaev Quryltaı otyrysynda «Jańa tarıhı kezeńdegi Qazaqstannyń ózekti mindetteri» atty Joldaýyn jarııalap jatqanyn jazǵan edik.