Toqaev Úkimetke «Derekterdi óńdeý ortalyqtarynyń alqaby» jobasyn muqııat pysyqtaýdy tapsyrdy
ASTANA. KAZINFORM — Prezıdent senimdi ınfraqurylymdy tsıfrlyq ekonomıkanyń taǵy bir berik tuǵyry retinde atady, dep habarlaıdy Aqordanyń baspasóz qyzmeti.
Memleket basshysy Qasym-Jomart Toqaevtyń sózinshe, bul — tehnologııalyq derbestiktiń alǵysharty. Onyń mańyzy energetıka nemese logıstıka salasynan kem túspeıdi.
— Esepteý qýatyn, derekterdi jáne baılanys arnalaryn baqylaýda ustaý aıryqsha ózekti. Qazirgi zamanda muny ózgelerden táýelsiz bolýdyń buljymas qaǵıdasy desek, artyq aıtqandyq emes. Bizge jasandy ıntellekt pen «bultty» tehnologııa qyzmetterine arnalǵan ınfraqurylymdyq bazany damytý kerek. Osy baǵyttaǵy basty joba — «Derekterdi óńdeý ortalyqtarynyń alqabyn» qurý isin júıeli júrgizý qajet. Bul — aldaǵy ýaqytta ekonomıkamyzdyń jańa ındýstrııalyq tiregine aınalatyn aýqymdy klaster. Mundaı ortalyqtar kásipkerler men ǵalymdardy esepteý resýrstarymen qamtamasyz etedi. Senimdi tsıfrlyq ınfraqurylym elimizdiń strategııalyq aktıvine aınalýǵa tıis. Úkimet «Derekterdi óńdeý ortalyqtarynyń alqaby» jobasyn muqııat pysyqtaýy qajet. Bul rette halyqaralyq standarttar jáne osy saladaǵy jetekshi kompanııalar bekitken talaptar eskerilýge tıis. Eń bastysy, bul asa mańyzdy jospar elimizdiń suranysyna saı jáne zamanaýı ozyq úrdisterdi eskere otyryp jasalǵany jón. Data-ortalyqtar — sándi tsıfrlyq tehnologııalar kórmesi emes, — dedi Memleket basshysy.
Qasym-Jomart Toqaev kıberqaýipsizdik jiti qadaǵalanbasa, kez kelgen ınfraqurylym syr beretinin málimdedi.
— Ulttyq tehnologııalyq ónimniń bárine qaýipsizdik standarttaryn engizý kerek. Derbes derekterdi qorǵaý mindeti Konstıtýtsııada naqty bekitildi. Sondyqtan bul jumys qupııalyq, tutastyq, qoljetimdilik qaǵıdattaryna negizdelýi qajet. Memlekettik tsıfrlyq qyzmetterdiń turaqty ári qaýipsiz jumys isteýi — basty talaptyń biri. Ashyqtyq, jahandyq ıntegratsııa jáne ulttyq múdde arasyndaǵy teńgerimdi saqtaý — aıryqsha mańyzdy. Memleket osy jumysty tıimdi uıymdastyrǵany durys. Tsıfrlyq qaýipsizdik máselesi vırtýaldy keńistik aýqymynan áldeqashan shyǵyp ketti. Taıaý Shyǵystaǵy oqıǵalar jahandyq tártiptiń osal tustaryn aıqyndap berdi. Ókinishke qaraı, búginde damyǵan elderdiń tsıfrlyq ınfraqurylymyna qater tónip turǵany jasyryn emes. Mundaı jaǵdaıda halyqaralyq bızneske qaýipsizdik aýadaı qajet. Jahandyq tehnologııalyq qaýymdastyq úshin ınstıtýttar men quqyqtyq júıeniń turaqty, al tsıfrlyq ınfraqurylymnyń sapaly bolǵany óte mańyzdy. Qazaqstandy «tsıfrlyq habqa» aınaldyrý jóninde mindet qoıdyq. Demek osy talaptyń údesinen shyǵa bilý qajet, — dedi Prezıdent.
Budan buryn Qasym-Jomart Toqaev ekonomıkany tsıfrlandyrý tıimdiligin arttyrý úshin ólshemdi kórsetkishter qajet ekenin eske saldy.
