Toqaev Úkimetke aýyl sharýashylyǵy kooperatsııasy týraly jańa zań daıyndaýdy tapsyrdy
ASTANA. KAZINFORM — Qazaqstan aýyl sharýashylyǵy kooperatsııasyn Nıderland tásilimen damytý kerek. Memleket basshysy Qasym-Jomart Toqaev Úkimettiń keńeıtilgen otyrysynda osyndaı tapsyrma berdi.
— Elimizde mal sharýashylyǵyn damytýǵa mol múmkindik bar. Biraq biz osy áleýetimizdi durys paıdalanbaı otyrmyz. Mal sharýashylyǵynyń damý strategııasy da, qarqyny da mardymsyz, túsiniksiz, keshendi júıe joq. Bul salada sheshimin tappaı turǵan másele kóp. Ónimderdiń basym bóligi jeke qosalqy sharýashylyqtarda jáne sharýa qojalyqtarynda óndiriledi. Ettiń 60 paıyzy, súttiń 80 paıyzy — solardyń enshisinde, — dedi Memleket basshysy.
Prezıdenttiń paıymdaýynsha, Bul jaǵdaı ónimdilikti arttyrýǵa kedergi bolyp otyr.
— Elimizde jem-shóp qoryn daıarlaýdan bastap, ónimdi óńdeý, jetkizý, satý úderisi birtutas júıe retinde jolǵa qoıylmaǵan. Basqasha aıtsaq, osynyń bárin basqarýdyń biryńǵaı júıesi joq. Ókinishke qaraı, 2026 jyly osyndaı máseleler týraly aıtýǵa májbúr bolyp otyrmyz. Bıyl Mal sharýashylyǵyn damytý jospary jasaldy. Bul qujat osy saladaǵy olqylyqtardy joıyp, onyń damýyna jol ashýy tıis. Endi aqyry ne bolatynyn kóremiz, — dedi Qasym-Jomart Toqaev.
Memleket basshysy «Turkistan» gazetine bergen suhbatyn eske aldy.
— Bul jerde sheteldik tájirıbeni úlgi retinde alýǵa bolady. Mysaly, Nıderland eliniń júıesin alsaq, onda sharýalar kooperatsııasynyń naqty ári birizdi júıesi bar. Sonyń arqasynda olar quny 130 mıllıard dollar bolatyn aýyl sharýashylyǵy ónimderin eksporttap otyr. Sharýalardy jańa úlgidegi kooperatıv qurýǵa yntalandyrý kerek. Ol úshin Úkimet batyl sharalar qabyldaýy tıis. 1 qyrkúıekke deıin Aýyl sharýashylyǵy kooperatsııasy týraly jańa zań daıyndaýy qajet, — dedi Prezıdent.
Aıta keteıik, búgin Memleket basshysy Qasym-Jomart Toqaevtyń tóraǵalyǵymen Úkimettiń keńeıtilgen otyrysy ótip jatyr. Jıynda eldiń 2025 jylǵy áleýmettik-ekonomıkalyq damýy qorytyndylanyp, Úkimettiń aldaǵy kezeńge arnalǵan negizgi mindetteri aıqyndalady.
