Toqaev Úkimet usynǵan sharalar týraly: Bıýdjetti Ulttyq qordan qosymsha qarjy almaı-aq tolyqtyrýǵa múmkindik beredi
ASTANA. KAZINFORM – Prezıdent Qasym-Jomart Toqaev Úkimettiń keńeıtilgen otyrysynda Bıýdjet jáne Salyq kodeksterin jedel qabyldaýdy tapsyrdy.
- Jańa óndiris oryndaryn ashý, ınfraqurylymdy damytý jáne úderisterdi tsıfrlandyrý úshin ınvestor qarjysyn tartý qajet ekeni túsinikti. Bir jaǵynan memleket te ekonomıkaǵa salynatyn ınvestıtsııa kólemin ulǵaıta beredi. Sondyqtan Úkimet barlyq qarjyny basty basymdyqtarǵa saı bólýi kerek. Bul – Úkimet pen ákimder buljytpaı oryndaýǵa tıis negizgi bıýdjet qaǵıdatynyń biri. Elimizde jańa ári barynsha qatań bıýdjet erejeleri qoldanysqa engizilgenine eki jyl boldy. Alaıda, shyn máninde, bul júıe jumys istep turǵan joq. Nelikten olaı boldy? Oǵan Úkimet ózi jaýap berýge tıis, - dedi Prezıdent.
Qasym-Jomart Toqaev transfertterdi eseptegen kezde barlyq dısproportsııany eskerý mańyzdy ekenin atap ótti.
- Úkimet usynǵan sharalar bıýdjetti Ulttyq qordan qosymsha qarjy almaı-aq tolyqtyrýǵa múmkindik beredi. Biraq naqty eseptep, janama faktorlardyń bárin eskerý kerek. Sol sebepti jańa Bıýdjet jáne Salyq kodeksterin tyńǵylyqty ázirlep, qysqa merzimde qabyldaý mindeti tur. Memleket qarjysyn barlyq deńgeıdegi bıýdjetke ratsıonaldy ári ádil bólýdiń mańyzy zor. Tipti aýyldyq okrýgterge deıin qamtylýǵa tıis. Jalpy sıpattaǵy transfertterdi eseptegen kezde barlyq dısproportsııany eskergenimiz jón. Respýblıkalyq bıýdjetten, eń aldymen, kenjelep qalǵan belgili bir óńirdi jalpy eldiń damý deńgeıine jaqyndatatyn jobalar qarjylandyrylýǵa tıis. Áıtse de barsha aımaqtyń máseleleri men qajettilikteri Úkimettiń jiti nazarynda bolýy kerek. Óńirlerdiń damý qarqyny báseńdeýine jáne áleýmettik-ekonomıkalyq jaǵdaıdyń nasharlaýyna múldem jol berýge bolmaıdy, - dedi Qasym-Jomart Toqaev.
Aıta keteıik elordada Prezıdent Qasym-Jomart Toqaevtyń tóraǵalyǵymen Úkimettiń keńeıtilgen otyrysy ótip jatyr. Іs-sharany ashqan Prezıdent Úkimet pen ákimder jumysynyń tıimdiligi azamattardyń turmys sapasyna qaraı baǵalanatyn aıtty. Sonymen qatar, Memleket basshysy Úkimet áleýmettik kómek máselesine kelgende tym saqtyq tanytyp otyrǵanyn aıtqan edi.