Toqaev Úkimetke uly kósh datasyn kúntizbege engizýdi tapsyrdy

NUR-SULTAN. QazAqparat – Ulttyq qoǵamdyq senim keńesiniń 6-otyrysynda QR Prezıdenti Qasym-Jomart Toqaev Úkimetke Uly kóshtiń bastalýyna jol ashqan datany ataýly kúnder kúntizbesine qosý máselesin qarastyrýdy tapsyrdy, dep habarlaıdy QazAqparat tilshisi.

«Barshańyzǵa málim, qandastarymyzdyń óz atajurtyna oralý máselesi týraly Tuńǵysh Prezıdentimiz birqatar mańyzdy tarıhı sheshim qabyldaǵan edi. Uly kósh 1991 jyly bastaldy. Buǵan Elbasynyń tapsyrmasymen Qazaq KSR Mınıstrler kabıneti qabyldaǵan №711 qaýly resmı túrde jol ashty. Bul qujat 1991 jylǵy 18 qarashada qabyldandy. Kóp uzamaı Elbasy «Alysta júrgen aǵaıynǵa aq tilek» atty Joldaýyn jarııalap, shettegi qandastarymyzdy elge shaqyrdy»- dedi Qasym-Jomart Toqaev.

Memleket basshysy sonyń nátıjesinde 1,5 mln-nan astam qazaq tarıhı otanyna oralǵanyn atap ótti.

«Búginde olar egemen elimizdi órkendetýge óz úlesin qosýda. Solardyń ishinde Aýyt Muqıbek jáne taǵy basqa qoǵam qaıratkerleri Uly kóshtiń tarıhı rólin eskerip, arnaıy kún belgileý qajettigin aıtyp júr. Úkimetke osy tarıhı datany ataýly kúnder kúntizbesine qosý máselesin jan-jaqty qarastyryp, tıisti usynys engizýdi tapsyramyn», - dedi QR Prezıdenti.