Toqaev Úkimetke medıtsınalyq saqtandyrý júıesin jetildirý jóninde usynystar ázirleýdi tapsyrdy
«Jalpy, densaýlyq saqtaý salasy týraly aıtar bolsaq, munda túıtkildi máseleler kóp. Qazaqstanda sozylmaly aýrý saldarynan qaıtys bolý kórsetkishi óte joǵary. Ásirese, Ekonomıkalyq yntymaqtastyq jáne damý uıymyna múshe eldermen salystyrǵanda bizdegi ahýal óte nashar», - dedi Qasym-Jomart Toqaev.
Memleket basshysy medıtsına salasyna bólingen qarjy kólemi artqanymen, munda qordalanǵan máseleler sheshimin tappaı otyrǵanyn basa aıtty.
«Mindetti áleýmettik medıtsınalyq saqtandyrý júıesi tıimdi bolmady, naqty nátıje joq. Úsh mıllıonǵa jýyq adam medıtsınalyq saqtandyrýdan tys qalǵan. Sonyń kesirinen olar densaýlyq saqtaý salasyndaǵy qyzmetterdi tolyq paıdalana almaıdy. Úkimet Strategııalyq josparlaý jáne reformalar agenttigimen birlesip, medıtsınalyq saqtandyrý júıesin jetildirý jóninde usynystar daıyndaýy kerek», - dedi Qazaqstan Prezıdenti.
