Toqaev ýaqyt beldeýi týraly: Pikirtalasty doǵarý qajet
BÝRABAI. KAZINFORM – Prezıdent Qasym-Jomart Toqaev Býrabaıda ótip jatqan Ulttyq quryltaıdyń IV otyrysynda biryńǵaı ýaqyt beldeýine kóshý máselesine pikir bildirdi.
- Endi biryńǵaı ýaqyt beldeýine kóshýge qatysty pikirtalasqa toqtalaıyn. Úkimet pen Parlament bul máseleni talqylady. Arnaıy zertteýler júrgizildi, sheshimge kúmán keltirgen qoǵam belsendileriniń qaýpi men kúmán-kúdigi rastalǵan joq, - dedi memleket basshysy.
Memleket basshysy qazirgi júıe memleketti basqarý isin jeńildetetinin atap ótti.
- Úkimettiń jáne depýtattardyń basym kópshiliginiń, sondaı-aq mamandardyń ýájimen kelisemin: bizdiń keń-baıtaq jerimiz bar, halqymyzdyń sany da salystyrmaly túrde alǵanda kóp emes. Sondyqtan elimizde biryńǵaı ýaqyt beldeýi bolýǵa tıis. Bul tásil memleketti basqarý isin jeńildetedi, logıstıka men kóptegen bıznes-úderisti ońtaılandyrýǵa septigin tıgizedi. Osymen pikirtalasty doǵarý qajet dep oılaımyn, onyń ústine bul máseleni saıasılandyrýdyń qajeti joq, - dedi Qasym-Jomart Toqaev.
Aıta ketý kerek, quryltaıdyń paneldik sessııalary keshe bastalǵan. Ol sektsııalardyń taqyryptary azamattyq qoǵam, mádenıet, óner, rýhanııat, bilim jáne ǵylym, áleýmettik-ekonomıkalyq damý máselelerin qamtydy.
Buǵan deıin Mádenıet jáne aqparat mınıstri Aıda Balaeva jıynnyń alǵashqy kúninde aıtylǵan usynystar týraly málimet bergen edi.
Al Ǵylym jáne joǵary bilim mınıstri Saıasat Nurbek Ulttyq quryltaıdyń 4-otyrysy aıasynda Qazaqstan tarıhynyń jańa akademııalyq basylymyn ázirlenetinin aıtty.
2022 jyly Ulttyq quryltaı alǵash jandanǵannan beri eldegi áleýmettik-ekonomıkalyq máseleler sheshim taýyp keledi. Jyl ótken saıyn taqyryp aıasy keńidi, aıtylatyn salmaqty oı ulǵaıdy.