Toqaev TJ rejıminiń sozylý sebebin túsindirdi
NUR-SULTAN. QazAqparat – Prezıdent Qasym-Jomart Toqaev elimizde tótenshe jaǵdaı rejımin ne úshin sáýirdiń aıaǵyna deıin sozýdy tapsyrǵanyn túsindirdi, dep habarlaıdy QazAqparat tilshisi.
«Adamdar qazir kóshege shyqqysy keledi. Kúndelikti qalypty ómirine qaıtýǵa nıetti. Biraq karantın men óz-ózimizdi oqshaýlaýdan basqa amal da joq. Bul – otandyq jáne halyqaralyq vırýslolog-mamandardyń keńesi. Basqa jaǵdaıda biz jaǵdaıdy ýshyqtyryp alamyz. Epımedııa jappaı elimizdi jaılaǵanymen qoımaı, búkil tutas ulttyq densaýlyǵyna qaýip tónedi. Onymen qosa ulttyq qaýipsizdikke de qater keledi. Olaı bolsa shaǵyn jáne orta bıznes, tipti ekonomıkany saqtap qalýdyń ózi kún tártibinde mańyzyn joǵaltary anyq», - dedi Qasym-Jomart Toqaev Tótenshe jaǵdaı rejımin qamtamasyz etý jónindegi memlekettik komıssııanyń otyrysynda.
Eske sala ketsek buǵan deıin QR Prezıdentiniń baspasóz hatshysy Berik Ýálı Qasym-Jomart Toqaevtyń tóraǵalyǵymen Tótenshe jaǵdaı jónindegi Memlekettik komıssııanyń otyrysynda TJ rejımin sáýirdiń aıaǵyna deıin sozýdy tapsyrǵanyn habarlaǵan edi.
