Toqaev Túrkistan oblysynda aýyl sharýashylyǵy ónimderiniń kórmesin aralady
TÚRKІSTAN. KAZINFORM - SPK TURKISTAN óndiristik parkinde uıymdastyrylǵan kórmege et, sút jáne balyq ónimderi, sýsyn, balmuzdaq, shokolad túrleri, sondaı-aq iri aýyl sharýashylyǵy birlestikteri ósirgen jemis-jıdekter men kókónister qoıylǵan.
Prezıdentke óńirde agroónerkásip keshenin damytýdyń negizgi baǵyttary tanystyryldy.
Atap aıtqanda, oblysta aýyl sharýashylyǵy daqyldarynyń ónimdiligin arttyrýǵa, sý únemdeý tehnologııalaryn engizýge, jylyjaılardy kóbeıtýge jáne ınvestıtsııalyq jobalardy júzege asyrýǵa den qoıylmaq.
2030 jylǵa qaraı óńirde sýarmaly jerlerdiń 40 paıyzyna sý únemdeý tehnologııalary engizilip, aýmaǵy 602 gektardy quraıtyn jańa jylyjaı keshenderi iske qosylady.
Sonymen qatar aldaǵy úsh jylda 105 ınvestıtsııalyq jobany júzege asyrý arqyly 8 myńnan astam jańa jumys ornyn ashý kózdelgen.
Qasym-Jomart Toqaev kásipkerlermen áńgimelesip, aýyl sharýashylyǵynyń ónimdiligin arttyrý máselesi jóninde pikir almasty.
– Jumys óte sátti júzege asyrylyp jatyr eken. Úkimet óńirge kómek kórsetedi. Túrkistan oblysynyń jaǵdaıy jaman emes. Ákim jaqsy jumys istep jatyr. Qolynan is keledi. Sondyqtan oblystyń keleshegi zor dep oılaımyn. Barshańyzǵa sáttilik tileımin, – dedi Prezıdent.
Budan bólek, Memleket basshysy sý únemdeý tehnologııasyn engizýdiń mańyzdy ekenine nazar aýdardy.
