Toqaev Túrkııa halqyn 100 jyldyq mereıtoıymen, al Ázerbaıjandy el irgesin bekemdeýimen quttyqtady
Aqordada ótip jatqan Túrki memleketteri uıymynyń H sammıtinde Memleket basshysy Qasym-Jomart Toqaev Túrkııa halqyn 100 jyldyq mereıtoıymen, al Ázerbaıjan halqyn el irgesin bekemdeýimen quttyqtady, dep habarlaıdy Kazinform.
«Baýyrym Rejep Taııp Erdoǵan myrzaǵa jáne barsha túrik aǵaıyndarǵa Túrkııanyń 100 jyldyq mereıtoıy qutty bolsyn degim keledi. Anadolynyń ǵasyrlyq shejiresi bıik beleske, zor jetistikke toly. Uly tulǵalarynyń arqasynda búginde Túrkııa búkil álemge yqpaly bar qýatty memleketke aınaldy. Sondaı-aq qadirli Ilham Geıdaruly Álıev myrzany jáne Ázerbaıjan halqyn el irgesin bekemdeýimen quttyqtaımyn. Sizdiń elińiz aýmaqtyq tutastyǵyn qalpyna keltirip, damýdyń jańa tarıhı dáýirine qadam basty. Osy tarıhı qadam BUU-nyń jarǵysyna jáne Qaýipsizdik keńesiniń qararyna sáıkes júzege asty», - dedi Qazaqstan Prezıdenti.
Sonymen qatar Qasym-Jomart Toqaev Ózbekstan Prezıdenti Shavkat Mırzıeevke túrki elderiniń yntymaqtastyǵyn nyǵaıtýǵa zor úles qosqany úshin erekshe alǵysyn bildirdi.
