Memleket basshysy týrızmniń qarqyndy damýyna jol ashatyn baǵyttardy atady

ASTANA. KAZINFORM — Prezıdent týrızm — Mańǵystaý aımaǵy ekonomıkasynyń munaı-gaz salasynan keıingi mańyzdy sektory ekenin aıtty, dep habarlaıdy Aqordanyń baspasóz qyzmeti.

Mańǵystaý oblysynyń áleýmettik-ekonomıkalyq damýy jónindegi keńes barysynda Memleket basshysy Qasym-Jomart Toqaev byltyr oblysqa shetelden 43 myń týrıst kelgenin málim etti.

— Týrızm — aımaq ekonomıkasynyń munaı-gaz salasynan keıingi mańyzdy sektory. Byltyr oblysqa shetelden 43 myń týrıst keldi. Elimizdiń basqa aımaqtarynan kelgen qonaqtardyń sany 460 myńǵa jýyqtady. Sońǵy úsh jylda jalpy týrıster sany 1,5 ese artty. Jazda qonaq úılerdiń 90 paıyzdan astamy bos bolmaıdy. Beket Ata jerasty meshitine, Bozjyra shatqalyna, Aıraqtydaǵy «Qamaldar alqabyna» jáne Toryshtaǵy domalaq tastarǵa týrıster óte kóp barady. Mańǵystaýǵa keletin árbir onynshy adam osy nysandarǵa arnaıy soǵady, — dedi ol.

Prezıdent týrısterge, ásirese, múmkindigi shekteýli jandarǵa qolaıly jaǵdaı jasaý qajet ekenin atap ótti.

— Men muny únemi aıtyp júrmin. Osy baǵyttaǵy jumysty jalǵastyrý qajet. Beket Ata jerasty meshitine kóterilý úshin avtomatty qondyrǵy ornatý týraly usynysty muqııat qaraý kerek. Jalpy, týrıstik nysandarǵa sondaı júıe ornatý álemdik tájirıbede bar. Biraq kesene — halqymyz úshin kıeli oryn. Sondyqtan jurtshylyqpen, túrli mamandarmen aqyldasyp, jan-jaqty oılastyryp sheshim qabyldaǵan jón. Men bul usynysty qoldaımyn, — dedi Toqaev.

Memleket basshysy Aqtaý — kólik-logıstıka, týrızm turǵysynan biregeı qala ekenin aıtty.

— Men byltyr týrızmdi damytý jónindegi jıynda áleýeti zor baǵyttardy atap óttim. Al naqty Aqtaýǵa keletin bolsaq, bul — kólik-logıstıka, týrızm turǵysynan biregeı qala. Bul áleýetti tıimdi paıdalanýymyz kerek. Sondaı-aq teńiz týrızmine basa nazar aýdarý qajet. Bes eldiń teńiz aılaqtary bir-birine jaqyn ornalasqan. Reseı, Iran jáne Kavkaz elderiniń mıllıonnan astam turǵyny bar 10 qalasynan týrıster shaqyrýǵa bolady. Ystanbul, Antalıa, London, Máskeý, Astrahan, Tbılısı, Baký jáne basqa da qalalardan shyǵatyn ushaqtardyń tranzıttik dálizderi osy jerde toǵysady. Munyń bári týrızmniń qarqyndy damýyna jol ashady. Aqtaý portynda jańa teńiz portyn salý qajettigi týyndap otyr. Aılaqtardy jolaýshy tasıtyn kemeler toqtaýǵa bolatyndaı etip jańǵyrtý kerek, — dedi ol.

Sonymen qatar Prezıdent týrızm salasyna jeke ınvestıtsııa tartý máselesine toqtaldy.

— Úkimet «Mańǵystaý» týrıstik aımaǵyn damytýdyń keshendi josparyn shuǵyl túrde bitirýi kerek. Maýsym aıynda bul jospardy maquldaımyz. Oblys ákimdigi Úkimettiń qoldaýymen osy salaǵa jeke ınvestıtsııa tartý máselesin pysyqtaýy qajet. Taǵy bir másele, bul — is-sharalar týrızmi (Event tourism). Aqtaý túrki áleminiń mádenı astanasy mártebesin aldy. Jaqynda ashylý rásimi jaqsy ótti. Bul is-sharaǵa óz azamattarymyzben qatar, túrkitildes elder de zor qyzyǵýshylyq tanytty. Aldaǵy ýaqytta 30-dan astam is-shara ótkiziledi. Osynyń bári aımaqqa týrıster tartýǵa jol ashýǵa tıis. Bul jumysty belsendi júrgizý qajet. Jalpy, aımaqqa shetel ınvestıtsııasy turaqty kelip jatyr. Biraq onyń úshten ekisi munaı-gaz sektoryna tıesili. Sondyqtan basqa da salalarǵa belsendi túrde ınvestor tartý qajet, — dedi Toqaev.

Aıta keteıik, Memleket basshysy Qasym-Jomart Toqaevtyń tóraǵalyǵymen Mańǵystaý oblysynyń áleýmettik-ekonomıkalyq damýy jónindegi keńes ótip jatyr.

Prezıdent Úkimet pen «Samuryq-Qazyna» qoryna aımaqtaǵy sý tapshylyǵyn azaıtý úshin naqty sheshim qabyldaýdy tapsyrdy.

Toqaev Jańaózendegi gaz óńdeý zaýyty qurylysynyń keshigýi — Úkimettiń óreskel olqylyǵy ekenin atap ótti.