Toqaev transshekaralyq ınfraqurylymǵa tóngen qaýip týraly aıtty
NЬıÝ-DELI. KAZINFORM — Qazaqstan Prezıdenti transshekaralyq ınfraqurylymǵa tóngen qaýip-qaterdiń ulǵaıa túsýin taǵy bir kúrdeli problema retinde atady, dep habarlaıdy Aqordanyń baspasóz qyzmeti.
— Dál osy sebepti beıbitshilik pen strategııalyq turaqtylyq ekonomıkalyq jáne ornyqty damýǵa qajetti alǵysharttar sanalady. Alaıda bul ekonomıka sheńberine de syımaıtyn másele. Saıası dıalog pen dáıekti dıplomatııa arqyly aımaqtaǵy shıelenisti báseńdetip, uzaqmerzimdi turaqtylyq ornatýǵa basymdyq berilýge tıis. Keńirek qaraıtyn bolsaq, halyqaralyq qaýipsizdik arhıtektýrasynyń kúıreýi jáne uzaqqa sozylǵan qaqtyǵystar jańa qarýlaný jarysy men strategııalyq qatelikterdi, sondaı-aq jańsaq sheshimder qabyldaý qaýpin kúsheıtedi. Sondyqtan ıadrolyq, sonyń ishinde jańa tehnologııalarǵa qatysty qaterlerdi azaıtý maqsatynda atom qarýy bar derjavalardyń joǵary deńgeıdegi dıalogy óte qajet, — dedi Qasym-Jomart Toqaev.
Memleket basshysynyń paıymdaýynsha, jetekshi derjavalar arasynda senim deńgeıiniń tómendeýi Birikken Ulttar Uıymynyń tıimdi áreket etý múmkindikterin shekteıdi.
— Alaıda BUU-ǵa balama joq. Reforma Uıymnyń qaqtyǵystardyń aldyn alyp, ujymdyq sheshimder qabyldaý áleýetin nyǵaıtýǵa tıis. BUU Jarǵysy múltiksiz saqtalýy qajet. Ony árkim óz betinshe qoldanýyna bolmaıdy. Qaýipsizdik Keńesin reformalaý kezinde qazirgi álemniń jaǵdaıy eskerilip, onyń quramynda Azııa, Afrıka jáne Latyn Amerıkasy elderiniń ókilderi bolýyn qamtamasyz etken jón. Damyp kele jatqan orta derjavalar da jahandyq aýqymdaǵy sheshim qabyldaýǵa salmaqty ún qosýy kerek. Óıtkeni olar dıalogty órbitip, geosaıası qaıshylyqtar men kelispeýshilikterdi eńserýge yqpal ete alady. Qazaqstan seriktes el retinde BRIKS-ti naqty yntymaqtastyqqa arnalǵan, BUU-nyń kópjaqty júıedegi jetekshi rólin tolyqtyratyn ári halyqtardy, óńirler men naryqtardy ózara baılanystyratyn ashyq alań retinde qarastyrady. Árbir kúrdeli máseleniń sheshimin izdeý — bizdiń buljymas ustanymymyz. Bul Qazaqstannyń barlyq seriktestermen ózara tıimdi yqpaldastyqqa umtylatyn teńgerimdi, naqty nátıjege baǵdarlanǵan syrtqy saıasatyna saı keledi, — dedi Prezıdent.
Buǵan deıin Memleket basshysy qonaqjaılyq tanytqan jáne BRIKS sammıtin joǵary deńgeıde uıymdastyrǵan Premer-mınıstr Narendra Modıge alǵys aıtty.
