Toqaev Trampty AQSh táýelsizdiginiń 250 jyldyǵymen quttyqtady
ASTANA.KAZINFORM - Qazaqstan Prezıdenti Qasym-Jomart Toqaev Amerıka Qurama Shtattarynyń Prezıdenti Donald Tramppen telefon arqyly sóılesti. Bul týraly Aqorda habarlady.
Memleket basshysy Amerıka kóshbasshysyn AQSh táýelsizdiginiń 250 jyldyǵymen quttyqtap, tarıh úshin qas-qaǵym sát sanalatyn úsh urpaqtyń ǵumyryna barabar kezeńde bul eldiń qýatty jahandyq derjavaǵa aınalǵanyna nazar aýdardy.
Prezıdent AQSh ákimshiliginiń aqyl-parasatqa arqa súıegen ishki saıası baǵdary elimizde iske asyrylyp jatqan «Zań men tártip» qaǵıdaty negizinde Ádiletti Qazaqstan qurý strategııasymen úndesetinin, sondyqtan Donald Tramp júrgizip otyrǵan saıasatty qoldaıtynyn aıtty. Áńgimelesý barysynda taraptar ekijaqty ekonomıkalyq yntymaqtastyq jáne saıası yqpaldastyq máseleleri jóninde pikir almasty.
Qasym-Jomart Toqaev byltyr qarasha aıynda Vashıngtonǵa jasaǵan sapary barysynda qol jetkizilgen mańyzdy kelisimder joǵary qarqynmen júzege asyrylyp jatqanyn atap ótti.
Memleket basshysy Qazaqstannyń ıadrolyq qarýdy jáne baıytylǵan ýrandy taratpaýǵa qatysty ustanymynan aınymaıtynyn rastady. Sondaı-aq halyqaralyq baqylaý rejımin nyǵaıtý maqsatynda MAGATE-men aradaǵy yntymaqtastyqtyń mańyzyna toqtaldy.
Budan bólek, jaqynda Aqordada senator Stıv Deınspen, AQSh Prezıdentiniń arnaýly ókili Serdjıo Gormen jáne Aq úıdiń basqa da joǵary laýazymdy tulǵalarymen, amerıkalyq iskerlik top ókilderimen bolǵan kezdesýler men kelissózderge oń baǵa berildi.
Qasym-Jomart Toqaev Donald Trampty ózine qolaıly ýaqytta Qazaqstanǵa saparmen kelýge shaqyrdy.
