Toqaev TMD-ny 2035 jylǵa deıin damytýdyń jańa strategııasyn ázirleýdi usyndy

Prezıdent basty yqpaldastyq baǵyttaryna toqtaldy. Eń áýeli, TMD-nyń uzaqmerzimdi basymdyqtaryn belgileý qajet.

— Táýelsiz Memleketter Dostastyǵyn damytý tujyrymdamasy 2007 jyly bekitilip, alty jyl buryn jańartylǵan edi. Odan keıin qabyldanǵan baǵdarlamalar men qujattar kóbine belgili bir salaǵa qatysty boldy. Sondyqtan kóbine bir-birimen sáıkespeıdi. Olardyń bárin biriktirip, ózara baılanysty birtutas júıe túzgen jón. Keleshekte Dostastyqtyń qandaı bolǵanyn qalaımyz? Eýrazııadaǵy geosaıası arhıtektýra jyldam ózgerip jatqan kezeńde onyń orny qandaı bolmaq? TMD-ǵa múshe memleketter osy saýaldardyń naqty jaýabyn tabýymyz qajet. Sondyqtan Atqarýshy komıtetke elderimizdiń úkimetterimen birlesip, TMD-nyń 2035 jylǵa deıingi damý strategııasyn ázirleýdi usynamyn. Bul — ortamerzimdi perspektıva. Eń aldymen, memleketterimiz úshin asa mańyzdy basymdyqtarǵa mán bergen jón. Olar: ekonomıka, energetıka, ınfraqurylym, ozyq tehnologııalar jáne adam kapıtaly. Mundaı tásil ornyqty progreske jetý jolyndaǵy is-áreketimizdiń úılesimdi ári birizdi bolýyna septigin tıgizedi, — dedi Prezıdent.

Memleket basshysynyń pikirinshe, ekonomıkalyq yqpaldastyqty tereńdetý jáne ındýstrııalyq-tehnologııalyq seriktestikti jetildirý erekshe mańyzǵa ıe. Bul rette ol Qazaqstan TMD elderiniń naryǵyna ádettegideı basymdyq beretinin aıtty — elimizdiń syrtqy saýda aınalymynyń shıreginen astamy Uıymǵa múshe memleketterdiń úlesinde.

— Ótken jyldyń qorytyndysy boıynsha TMD elderimen saýda aınalymy 40 mıllıard dollarǵa jýyqtady, al bıylǵy jeti aıda 10 paıyzǵa ósti. Birlesken óndiristerdi ashý isinde de úlken tájirıbe qalyptasty. Mysaly, Reseı Federatsııasynyń qatysýymen iske asyrylyp jatqan qazaqstandyq ónerkásip jobalary portfelinde jalpy quny 61 mıllıard dollar bolatyn 178 joba men bastama bar, onyń 124-i júzege asyryldy. Ózbekstanmen arada quny shamamen 2 mıllıard dollar bolatyn 80 joba boıynsha jumys júrgizilýde. Belarýspen arnaıy jáne aýyl sharýashylyǵy tehnıkasynyń birlesken óndirisi jolǵa qoıyldy, — dedi Qasym-Jomart Toqaev.

Eske salaıyq, buǵan deıin Prezıdent Qasym-Jomart Toqaev TMD-ǵa múshe memleketter basshylary keńesiniń otyrysyna qatysatynyn habarlaǵanbyz.