Toqaev Tájikstannyń Araldy qutqarý qoryndaǵy tóraǵalyq qyzmetine joǵary baǵa berdi
«Búkil óńirdiń ómiri úshin mańyzdy bolyp otyrǵan sý taqyryby jaǵymdy ráýishte qaraldy. Ortalyq Azııanyń sý resýrstaryn, transshekaralyq ózenderdi paıdalaný tásilderimizdiń uqsas ekenin, sondaı-aq, konstrýktıvti áriptestikti nyǵaıtyp, ózara qolaıly sheshimderdi izdeý qajettigin taǵy bir naqtyladyq. Bul máselede Araldy qutqarý qoryna erekshe ról artylyp otyr. Qazaqstan Tájikstannyń osy qorda tóraǵalyq etýin joǵary baǵalaıdy», - degen Memlket basshysy Tájik tarapyna Dýshanbedegi qyrkúıekte ótetin Araldy qutqarý halyqaralyq qorynyń sammıtin sátti ótkizýine tilektestik bildirdi.
«Óz tarapymnan Tájik tarapyna Azııadaǵy ózara yqpaldastyq jáne senim sharalary jónindegi keńesti qaltqysyz qoldap kele jatqany úshin alǵys aıttym», - dedi Qasym-Jomart Toqaev.
Sondaı-aq, Qasym-Jomart Toqaev Tájikstan Respýblıkasynyń Prezıdentimen kelissózdiń qorytyndysyna kóńili tolatynyn aıtty.
«Qurmetti Emomalı Rahmonnyń sapary memleketterimiz arasyndaǵy jan-jaqty ózara is-qımyldy damytýǵa qýatty serpin beretinine senimdimin. Qol jetkizilgen ýaǵdalastyqtar qazaq-tájik qarym-qatynastaryn nyǵaıtý turǵysynan aıryqsha mańyzǵa ıe jáne elderimizdi odan ári jaqyndastyrýǵa degen adal nıetińizdiń jarqyn aıǵaǵy bolyp tabylady. Biz, sondaı-aq, baýyrlas halyqtarymyzdyń ál-aýqaty men órkendeýi úshin kópjosparly qazaq-tájik yntymaqtastyǵyn sapaly jańa deńgeıge kóterý úshin bar kúshimizdi salamyz», - dedi Prezıdent.
Aıta keteıik, keshe Prezıdent Qasym-Jomart Toqaev Qazaqstanǵa memlekettik saparmen kelgen Tájikstan Prezıdenti Emomalı Rahmondy elorda áýejaıynda qarsy alǵan bolatyn.
Búgin Tájikstan Prezıdenti Emomalı Rahmonov Memleket basshysy Qasym-Jomart Toqaevpen Aqordada ótken keńeıtilgen quramdaǵy kelissóz kezinde bıyl Qazaqstan Tájikstannyń negizgi saýda seriktesine aınalýy múmkin ekenin aıtty.
