Toqaev slovaktardy Transkaspıı dálizin damytý jobasyna qatysýǵa shaqyrdy
ASTANA. KAZINFORM – Qazaqstan Slovakııanyń sý resýrstaryn basqarý isindegi ozyq tájirıbesin zerdelep, birlese jumys isteýge daıyn. Bul týraly Slovakııa Premer-mınıstri Robert Fıtsomen kelissózderden keıingi BAQ ókilderine arnalǵan brıfıngte Memleket basshysy Qasym-Jomart Toqaev aıtty.
- Biz kelissózder barysynda Transkaspıı halyqaralyq kólik dáliziniń áleýetin birge paıdalaný jaıyn talqyladyq. Bul strategııalyq mańyzy bar saýda jolynyń biri. Men slovakııalyq seriktesterimizdi osy dálizdiń damytý jobasyna qatysýǵa shaqyrdym. Bul saladaǵy yqpaldastyq ózara saýda-sattyqqa tyń serpin berýge tıis, - dedi Qasym-Jomart Toqaev.
Prezıdent mártebeli meımanmen kelissóz barysynda Slovakııanyń sý resýrstaryn basqarý isindegi ozyq tájirıbesin zerdelep, birlese jumys isteýge daıyn ekenimizdi jetkizgenin aıtty.
- Biz mádenı-gýmanıtarlyq baılanysty nyǵaıtýdyń mańyzdy ekenine toqtaldyq. Slovakııada eńbek etip júrgen Qazaqstan azamattarynyń áleýmettik jaǵdaıyna jáne quqyǵyn qorǵaý máselesine erekshe nazar aýdardyq. Sondaı-aq bilim salasyndaǵy baılanystardy tereńdetý jaıyn talqyladyq. Jastarymyz eki eldiń joǵary oqý oryndarynda bilim alyp júr. Olar bizdiń halyqtarymyzdy odan ary jaqyndastyra túsedi dep oılaımyn, - dedi Memleket basshysy.
Buǵan deıin Memleket basshysy Qasym-Jomart Toqaev Slovakııa Premer-mınıstri Robert Fıtsomen shaǵyn quramda kelissóz júrgizgenin jazǵan edik.
Al keńeıtilgen quramdaǵy kelissóz barysynda Memleket basshysy Slovakııa Qazaqstannyń Eýropalyq odaqtaǵy mańyzdy ári senimdi seriktesi ekenin aıtty.