Toqaev ShYU-da Investıtsııalyq qor qurý múmkindigin qarastyrýdy usyndy
Búgin ShYU elderi Memleket basshylarynyń keńesine qatysqan Q.Toqaev saýda-ekonomıkalyq baılanystardy keńeıtýdi usyndy.
«Geografııalyq turǵyda memleketterdiń baılanysy, kólik-tranzıt áleýeti, naryqtyń aýqymdylyǵy men ekonomıkalardyń birin-biri tolyqtyrýy ShYU-nyń basymdyǵy sanalady. Osyǵan qaramastan, ShYU aıasynda 20 jyldan astam ýaqyttan beri birde-bir iri ekonomıkalyq jobany júzege asyrý múmkin bolmady. Jobany qarjylyq qoldaý mehanızmderiniń bolmaýy – munyń aıqyn faktory. Osyǵan baılanysty Úkimetter basshylarynyń keńesine birlesken Investıtsııalyq qor qurý múmkindigin qarastyrýdy tapsyrýdy jáne osy mańyzdy joba boıynsha usynystar aıtýdy usynamyn. Álemdegi qarjy ınstıtýttarynyń úzdik tájirıbelerin meńgergen «Astana» halyqaralyq qarjy ortalyǵy ShYU-nyń aımaqtyq jobalaryna tikeleı jáne portfeldi ınvestıtsııa quıýdy yntalandyrý úshin tıimdi platforma bola alady», - dedi Memleket basshysy.
Sondaı-aq QR Prezıdenti iri strategııalyq porttar men logıstıkalyq ortalyqtardyń seriktestik jelisin qurýdy usyndy.
«Ekonomıkalyq kooperatsııa kóbine kólik-tranzıt áleýetin tıimdi paıdalanýǵa baılanysty. Júk jetkizýdiń dástúrli tizbeginiń úzilýine baılanysty zamanaýı kólik ınfraqurylymyn qurýdyń jáne jańa básekeli baǵyttar ashýdyń strategııalyq mańyzy arta tústi. «Bir beldeý, bir jol» mega jobasy men Transkaspıı halyqaralyq kólik baǵdaryn júzege asyrýǵa birlese kúsh salý arqyly biz «Soltústik – Ońtústik» jáne «Shyǵys – Batys» dálizderiniń múmkindigin ashýdyń barlyq alǵyshartyn qalyptastyramyz. Іs júzindegi shara retinde Іri strategııalyq porttar men logıstıkalyq ortalyqtardyń seriktestik jelisin qurýdy usynamyz. Atalǵan mehanızmniń naqty modaldylyǵyn elderimizdiń úkimetteri qarastyra alady. Bul iske kólik jáne temir jol ákimshilikteriniń basshylaryn qatystyrý qajet», - dep atap ótti Q.Toqaev.
