Toqaev Shymkentte Oqýshylar saraıy men Opera jáne balet teatryn salýdy tapsyrdy
ASTANA. QazAqparat – Shymkentte jańa Oqýshylar saraıy men Opera jáne balet teatry salynady. Mundaı tapsyrmany Memleket basshysy Qasym-Jomart Toqaev júktedi, dep habarlaıdy QazAqparat tilshisi.
Shymkent jurtshylyǵymen kezdesýde Prezıdent áleýmettik ınfraqurylymdy damytýǵa nazar aýdardy.
«Men osy jyldy «Balalar jyly» dep jarııaladym. Osyǵan baılanysty elimizde birqatar aýqymdy is-shara atqaryldy. Shymkentte Oqýshylar saraıy jáne Balalar shyǵarmashylyq ortalyǵy salynyp jatyr. Biraq, bul jetkiliksiz. Qalanyń demografııalyq ósimin eskere otyryp, ákimdikke 2025 jylǵa deıin taǵy bir Oqýshylar saraıyn salýdy tapsyramyn», - dedi Qasym-Jomart Toqaev.
Sondaı-aq Shymkentte 5 jyldyń ishinde 101 mektep salý josparlanǵany atap ótildi.
«Bul jumysqa bıznes ókilderi belsene atsalysyp jatyr. Qalada sońǵy eki jylda 50 jekemenshik mektep ashyldy. Osy óńirdiń kásipkerleri kóptegen mektep salyp, bilim salasyna zor úles qosyp jatyr. Ákimdik aldaǵy jyly úsh aýysymdy mektep máselesin tolyǵymen sheshýge tıis», – dedi Qazaqstan Prezıdenti.
Budan bólek, Memleket basshysy mádenıet salasy da memlekettiń basty nazarynda ekenin jetkizdi.
«Qazir qalada aýqymdy is-sharalar ótkizetin mádenıet oshaǵy tapshy. Meniń tapsyrmam boıynsha 2 myń oryndyq Kongress holldyń qurylysy bastaldy. Bul nysan kelesi jyly paıdalanýǵa beriledi. Qalada Opera jáne balet teatry bar. Alaıda, onyń ǵımaraty talapqa saı emes. Sondyqtan, Úkimetke Shymkentte Opera jáne balet teatryn salýdy tapsyramyn», – dedi Prezıdent.
Foto: akorda.kz
