Toqaev ShYU múshe memleketter basshylary keńesiniń otyrysyna qatysty
ASTANA. KAZINFORM — Memleket basshysy qonaqjaılyq tanytyp, jıyndy joǵary deńgeıde uıymdastyrǵany úshin Qyrǵyz Respýblıkasynyń Prezıdenti Sadyr Japarovqa jáne barsha qyrǵyz halqyna rızashylyǵyn bildirdi.
— Kezdesýimiz bizge týys elder — Qyrǵyzstan men Ózbekstan táýelsizdiginiń 35 jyldyǵyn merekeleý kúnderimen tuspa-tus ótip jatyr. Munyń sımvoldyq máni zor. Oraıly sátti paıdalanyp, áriptesterim — qurmetti Sadyr Nýrgojoevıch Japarov pen qadirli Shavkat Mıromonovıch Mırzıeevti osy mańyzdy ári tarıhı kúnmen quttyqtaımyn. Baýyrlas halyqtarǵa baq-bereke tileımin! — dedi Qazaqstan Prezıdenti.
Qasym-Jomart Toqaevtyń aıtýynsha, shırek ǵasyrda Shanhaı yntymaqtastyq uıymy «Shanhaı bestiginen» bastap Eýrazııanyń úlken bóligin qamtıtyn jáne adamzattyń jartysyna jýyǵyn biriktiretin iri halyqaralyq uıymǵa aınaldy.
— ShYU — ártúrli, biraq rýhy bir elderdiń biregeı birlestigi retinde ishki máselege aralaspaý, egemendikti qurmetteý, ózara senim, ashyqtyq pen yntymaqtastyq qaǵıdattaryn is júzinde júzege asyryp keledi. Búginde ol shyn máninde tabysty, yqpaldy ári suranysqa ıe halyqaralyq qurylymǵa aınaldy. Áıtse de bizdiń Uıym qurylǵan sátten beri álem aıtarlyqtaı ózgerdi. Kóz aldymyzda halyqaralyq qatynastardyń jańa júıesi qalyptasyp jatyr. Birigýden góri jikke bóliný, yntymaqtastyq nıetinen góri geosaıası baqtalastyq basym túsip, múddeler teńgerimin izdeýdiń ornyna arazdyq órship barady. Ózara senimge selkeý tústi. Onsyz eń myqty halyqaralyq ınstıtýttardyń ózi birte-birte syn-qaterlerge tótep berý qabiletinen aıyrylady. Osy oraıda, bizdiń Uıymnyń mańyzy arta túsedi. ShYU áskerı-saıası blok logıkasynan tys áreket etedi ári onyń qyzmeti qandaı da bir memleketke qarsy baǵyttalmaǵan. Uıym múldem basqa saıası fılosofııaǵa, ıaǵnı túpki ózeginde progress jolyndaǵy ortaq bastamalar ıdeıasy jatqan «Shanhaı rýhyna» súıenedi. Bizdiń basty maqsatymyz — qýatty ári órkendegen ShYU qoǵamdastyǵyn qurý, — dedi Memleket basshysy.
Eske salaıyq, buǵan deıin Qasym-Jomart Toqaev Bishkekte ShYU-ǵa múshe memleketter basshylary keńesiniń otyrysyna bardy.
