Toqaev shekara mańyndaǵy óńirler úshin kólik jáne týrızm baılanysyn damytýdyń mańyzyn atap ótti
ASTANA. KAZINFORM — Qasym-Jomart Toqaev elderimizdiń kólik-logıstıkalyq baılanysyn nyǵaıtýdyń shekara mańyndaǵy aımaqtar úshin mańyzy zor dep sanaıdy. Bul týraly Aqorda málim etti.
— Shekara mańyndaǵy óńirlerde «500+» shartty ataýymen áýe qatynasyn damytýdyń birlesken baǵdarlamasyn ázirleý usynylady. Bastamaǵa sáıkes, Astana men Reseıdiń Qazaqstanmen shekaralas ári halyq sany 500 myńnan asatyn qalalary arasynda tikeleı áýe reısterin kezeń-kezeńimen ashý kózdelgen. Bul baǵdarlamanyń iske asýy óz kezeginde eki elge de týrısterdiń kóptep kelýine qolaıly jaǵdaı jasaıdy. Budan bólek, birlesken transshekaralyq týrıstik baǵyttar ashý da tıimdi dep esepteımin. Ol úshin elderimizdiń týrızm ındýstrııasy ókilderiniń arasyndaǵy yqpaldastyqty jandandyrǵan jón. Aıtpaqshy, Qazaqstanǵa demalýǵa jáne kórikti jerlerdi tamashalaýǵa keletin týrısterdiń sany jaǵynan Reseı qazir birinshi orynda tur. Ekinshi orynda — Qytaı, úshinshi — Úndistan, tórtinshi — Túrkııa. Týrızmdi qarqyndy damytýǵa múmkindigimiz jetkilikti. Atap aıtqanda, elimiz geografııalyq turǵydan utymdy ornalasqan. Alýan túrli tabıǵı landshaft, baı ári biregeı tarıhı-mádenı muramyz da kópshilikti qyzyqtyrady. Eń bastysy, Reseı týrısteri úshin Qazaqstanda til jáne mentaldyq turǵydan eshqandaı kedergi joq. Mádenıetimiz ben tarıhymyz ortaq. Shekara mańyndaǵy týrızmdi damytý ekonomıka qarqynyn arttyryp qana qoımaıdy. Bul — aradaǵy senimdi nyǵaıtyp, tatý kórshilik qatynastardyń birtutas keńistigin qalyptastyrýǵa salynǵan ınvestıtsııa. Ekijaqty baılanysymyzdyń qanshalyqty myqty ekeni osydan kórinedi. Ári bul birge ósip-órkendeýimizge tyń serpin beredi, — dedi Prezıdent.
Memleket basshysy Qazaqstan men Reseı arasyndaǵy qarym-qatynastyń beriktigi óńirlerdiń, isker toptardyń, ǵylymı jáne mádenı qoǵamdastyqtardyń belsendi baılanysy arqyly nyǵaıa túsetin joǵary deńgeıdegi senimdi dıalogtan, eń bastysy, mıllıondaǵan adamnyń dostyǵynan baıqalatynyn aıtty.
— Bizdiń san qyrly yntymaqtastyǵymyzda sabaqtastyq pen serpindi damý ózara úılesim tapqan. Ortaq tarıhymyzdy ardaqtaı otyryp, bolashaqqa birge kóz tigemiz. Qazaqstan uly Reseı elimen jasampaz strategııalyq seriktestikti damytýǵa árdaıym nıetti. Omby qalasyna menimen birge úlken delegatsııa keldi. Onyń quramynda ortalyq memlekettik organdardyń basshylary, shekaralas oblystardyń ákimderi, isker top ókilderi bar. Bul bizdiń júıeli jumys istep, ekijaqty yqpaldastyqtyń negizgi baǵyttary boıynsha naqty kelisimderge qol jetkizýge múddeli ekenimizdi bildiredi. Búgingi forýmnyń nátıjesi Qazaqstan men Reseıdiń strategııalyq seriktestigi men odaqtastyq qatynastar jylnamasyndaǵy kezekti jarqyn kezeńge jol ashyp, memleketterimizdiń gúldenýine jáne baýyrlas halyqtardyń ıgiligin arttyrýǵa yqpal eteri sózsiz, — dedi Qasym-Jomart Toqaev.
Aıta keteıik, Prezıdent Qazaqstan–Reseı óńiraralyq yntymaqtastyq forýmyna qatysý úshin Ombyǵa bardy.
