Toqaev Sekseýil kentinde mektepke temirjoldan ótip baratyn oqýshylar máselesin sheshýdi tapsyrdy
NUR-SULTAN. QazAqparat – QR Prezıdenti Qasym-Jomart Toqaev Úkimetke Sekseýil kentinde temirjoldyń kesip ótip mektepke baratyn oqýshylardyń máselesin sheshýdi tapsyrdy, dep habarlaıdy QazAqparat.
«Egemen Qazaqstan» gazetindegi «Temir joldy jaǵalap top bala júr» atty maqaladan Sekseýil kentinde 360 bala kúndelikti mektepke barý úshin 13 relsti kesip ótetinin oqydym. Bul – óte ózekti másele. Ony sheshý úshin Úkimet naqty sharalar qabyldaýy qajet», dep jazdy Prezıdent Twitter-degi paraqshasynda.
Qyzylorda oblysynyń Aral aýdanyndaǵy Sekseýil kenti – temir jol boıyndaǵy iri toraptyq stansanyń biri. Stansa arqyly ótetin «Beıneý – Jezqazǵan» temir joly paıdalanýǵa berilgeli beri mundaǵy halyq sany da ósti.
«Sekseýil arqyly iri temir jol toraby ótedi. Kenttegi 3 mekteptiń (№87, 31 jáne 177 mektep) barlyǵy kenttiń negizgi bóliginde ornalasqandyqtan, jańa aýdanda turatyn 360 oqýshy sabaqqa kelý úshin kúnde 13 relsti kesip ótedi. Munyń oıyn balasy úshin qaýipti ekeni aıtpasa da túsinikti. Ári 3 mekteptegi bala sany da shamadan tys kóbeıdi», delingen atalmysh maqalada.
