Toqaev saılaýdan keıingi alǵashqy saparyn Reseıden bastaýynyń mańyzyn túsindirdi
«Áýeli Prezıdent laýazymyna qaıta saılanýymmen jeke quttyqtaýyńyz úshin rızashylyǵymdy bildirgim keledi. Atalǵan oqıǵadan keıingi eń birinshi sheteldik saparym Reseı Federatsııasyna jasalyp otyr. Onyń óziniń tereń saıası máni bar jáne bul saparymda belgili bir sımvoldyq mán bar», - dedi Prezıdent Qazaqstan-Reseı kelissózinde.
Memleket basshysy atap ótkendeı, eki aradaǵy dıplomatııalyq qarym-qatynastyń ornaǵanyna 30 jyl tolyp otyr.
«Bıyl biz dıplomatııalyq qarym-qatynasymyzdyń ornaǵanyna 30 jyl tolǵanyn atap óttik. Búgin osynaý tarıhı dataǵa arnalǵan deklaratsııaǵa qol qoıamyz. Qazaqstan úshin Reseı Federatsııasy negizgi strategııalyq áriptes bolǵan jáne bola da beredi. Bizdi túrli saladaǵy tamyry tereń ózara qarym-qatynas baılanystyryp jatyr», - dedi Qasym-Jomart Toqaev.
Aıta keteıik, kelissóz aldynda Memleket basshysy Reseı óńiraralyq yntymaqtastyq forýmynyń XVIII jalpy otyrysynda beınekonferentsııa formatynda qatysty.
