Toqaev saılaý týraly: Qandaı da bir saıası uıymǵa artyqshylyq berilgen joq

ASTANA. QazAqparat – Memleket basshysy Qasym-Jomart Toqaev VIII saılanǵan Qazaqstan Respýblıkasy Parlamentiniń birinshi sessııasynda kezekten tys depýtattar saılaýynda partııalarǵa, úmitkerlerge birdeı múmkindik berilgenin málim etti, dep habarlaıdy QazAqparat tilshisi.

«Úgit-nasıhat kezeńin jáne daýys berý barysyn aqparat quraldary jan-jaqty kórsetti.

Partııalarǵa, úmitkerlerge birdeı múmkindik berildi. Muny otandyq jáne sheteldik baıqaýshylar da aıtyp otyr. Qandaı da bir saıası uıymǵa artyqshylyq berilgen joq.

Prezıdent eshbir partııanyń múshesi emes. Oblys ákimderi partııa bólimshelerine jetekshilik etpeıdi. Joǵary laýazymdy qyzmetkerler partııa tiziminde bolǵan joq. ıAǵnı, barlyq partııalar saılaýǵa birdeı jaǵdaıda qatysty», - dedi Prezıdent.

Sondaı-aq, Memleket basshysy saıası partııalardyń saılaý aldyndaǵy televızııalyq pikirtalastaryna toqtaldy.

«Saılaýshylar da, úmitkerler de aıryqsha belsendi boldy. Saıası partııalar ár aımaqta el nazaryn ózine aýdarý úshin tartysqa tústi. Birneshe ret tikeleı efırde partııalar arasynda qyzý jáne tıimdi pikirtalas boldy. Bul – demokratııalyq qoǵam úshin qalypty úrdis. Munyń bári Qazaqstanda ashyq azamattyq qoǵamnyń nyǵaıyp kele jatqanyn kórsetti», - dedi Qasym-Jomart Toqaev.

Aıta keteıik, elordada VIII saılanǵan Qazaqstan Respýblıkasy Parlamentiniń birinshi sessııasy ótip jatyr. Jıynǵa Memleket basshysy Qasym-Jomart Toqaev qatysýda.