Toqaev Rejep Taııp Erdoǵandy Respýblıka kúnimen quttyqtady
ASTANA. KAZINFORM — Memleket basshysy Túrkııa Prezıdentine jedelhat joldady. Bul týraly Aqordanyń baspasóz qyzmeti habarlady.
Qasym-Jomart Toqaev Rejep Taııp Erdoǵandy Respýblıka kúnimen quttyqtady.
– Bul mereke – túrik halqynyń birligi men jasampazdyǵynyń aıqyn nyshany, memlekettiligi men turaqty damýynyń myzǵymas tuǵyry. Sizdiń kóregen basshylyǵyńyzdyń arqasynda Túrkııa saıası, áleýmettik-ekonomıkalyq jáne ǵylymı-tehnıkalyq salalarda bıik belesterdi baǵyndyryp, halyqaralyq qaýymdastyqtyń qýatty ári bedeldi múshesine aınaldy, – delingen jedelhatta.
Prezıdent eki el arasyndaǵy máńgilik dostyq jáne keńeıtilgen strategııalyq seriktestik deńgeıine kóterilgen qarym-qatynas halyqtarymyzdyń ıgiligi jolynda ilgerileı beretinine senim bildirdi.
Sondaı-aq Qasym-Jomart Toqaev Rejep Taııp Erdoǵannyń jaýapty qyzmetine tolaıym tabys, al baýyrlas Túrkııa halqyna baq-bereke tiledi.
Aıta ketelik Qasym-Jomart Toqaevtyń Túrkııaǵa resmı sapary bastalǵan edi.
