Toqaev iri qalalar men oblys ortalyqtaryna jaqyn jerlerde ekosaıabaqtar qurýdy tapsyrdy
ASTANA. KAZINFORM — Memleket basshysy Qasym-Jomart Toqaev Úkimetke aımaq ákimderimen birge iri qalalar men oblys ortalyqtaryna jaqyn jerlerde ekosaıabaqtar qurý týraly tapsyrma berdi, dep habarlaıdy Aqordanyń baspasóz qyzmeti.
Toqaevtyń sózinshe, bul tapsyrmanyń oryndalýyn Prezıdent Ákimshiligi qadaǵalaıdy.
— Men buǵan senimdimin. Bul strategııalyq sıpattaǵy mindet. Onyń oryndalýyn Prezıdent Ákimshiligi qadaǵalaýda ustaıdy. Degenmen bizge tez sheshim qabyldap, ári sapaly jumys atqarý qajet. Árbir máselege pikir talastyrýdyń qajeti joq. Elorda turǵyndarynyń kóbi demalysta nemese mereke kúnderi ádette Býrabaıǵa barady. Jol qashyq. Onyń ústine tabıǵı parktiń ekojúıesine aıtarlyqtaı salmaq túsedi. Sondyqtan Astana mańaıynda ekosaıabaqtar ashatyn ýaqyt jetti. Úkimetke aımaq ákimderimen birge iri qalalar men oblys ortalyqtaryna jaqyn jerlerde ekosaıabaqtar qurýdy tapsyramyn. Taǵy da qaıtalap aıtamyn, ol jerlerde de tazalyq bolýǵa tıis. Býrabaıda ne bolyp jatqanyn qarańyzdar. Uıat jaǵdaı. Ulttyq qoryqty búldirip jatqan bógde ǵalamsharlyqtar emes, ózimizdiń halqymyz ǵoı, — dedi Prezıdent.
Osyǵan deıin Memleket basshysy elorda zamanaýı ýrbanıstıkanyń úlgisi bolýy kerek ekenin aıtty.
Sonymen qatar ol Astana ákimine Smart City jobasyn tezdetip aıaqtaýdy tapsyrdy.
Budan bólek, Prezıdent memlekettik basqarýda ozyq japon tájirıbesin usyndy.