Qazaqstannyń JІÓ-si 398 mlrd dollarǵa jetedi – Toqaev
ASTANA. KAZINFORM — Prezıdent Qasym-Jomart Toqaev Temirtaýǵa jumys sapary barysynda Qarmet aktsıonerlik qoǵamynyń ujymymen jáne kásipodaq múshelerimen kezdesý ótkizdi.
Memleket basshysy óz sózinde oblystyń qarqyndy damyp kele jatqanyn atap ótti.
— Kenshiler mekenin naǵyz eńbek adamdarynyń kıeli besigi desek, artyq bolmaıdy. Qazir oblys ekonomıkasy qarqyndy damyp kele jatyr. Bul, árıne, qýanyshty jaǵdaı. Ásirese, aımaqtaǵy shıkizattyq emes ónim eksporty edáýir óskenin atap ótý kerek. Aýyr ónerkásip salasynda jalpy quny 4,2 trıllıon teńge bolatyn ónim óndirildi. Bul — shyn máninde, zor jetistik. Elimiz boıynsha da oń úrdis jalǵasýda. Osy jyldyń sońyna deıin Qazaqstannyń jalpy ishki óniminiń kólemi 398 mıllıard dollarǵa jetip qalady. Bul — Ortalyq Azııadaǵy eń joǵary kórsetkish. Al óńdeý ónerkásibiniń el ekonomıkasyndaǵy úlesi 14 paıyzdan asty. Munyń bári Qazaqstan halqynyń tabandy eńbeginiń, aýqymdy jumysynyń jemisi ekeni sózsiz. Osy oraıda, ásirese, oblystyń ósip-órkendeýine Qarmet zaýyty mol úles qosyp otyrǵanyn atap ótkim keledi. Qaraǵandy metallýrgııa zaýyty otandyq metallýrgııanyń qara shańyraǵy, tutas aımaqtyń ekonomıkalyq tiregi sanalady. Bul iri kásiporyn elimizdiń ındýstrııalyq áleýetin arttyrý isinde erekshe ról atqarady, — dedi Qasym-Jomart Toqaev.
Eske salaıyq, buǵan deıin Prezıdent Qarmet-tiń jańa prokat kesheniniń qurylysymen tanysqanyn jazǵan edik.
