Toqaev Pýtınge qos halyqtyń uly tulǵalary beınelengen erekshe syılyq tabystady
ASTANA. KAZINFORM — Qasym-Jomart Toqaev Vladımır Pýtınge qos halyqtyń uly perzentteri Shoqan Ýálıhanov pen Fedor Dostoevskıı beınelengen kartınany tartý etti. Bul týraly Aqorda málim etti.
Shoqan Ýálıhanov — qazaq halqynyń tuńǵysh ǵalymy, etnograf jáne saıahatshy. Bıyl Shoqan Ýálıhanovtyń týǵanyna 190 jyl tolyp otyr. Onyń ǵylymı jáne aǵartýshylyq qyzmeti qazaq halqynyń rýhanı damýyna zor áser etti.
Shoqan alǵashqy saýatyn aýyl moldasynan ashyp, keıin Omby kadet korpýsynda bilim nárimen sýsyndady. Bul oqý ornynda ol orys jáne batys ádebıetimen, ǵylymı jetistikterimen tanysyp, birneshe shet tilin meńgerdi. Zamandastary onyń bilimge degen erekshe qushtarlyǵyn jáne zerektigin atap ótken.
Shoqan óz zamanynyń áleýmettik ózgeristerin tereń túsindi. Halyqtyń bilim men ǵylym arqyly órkenıetke umtylýy — onyń negizgi armany boldy. Peterbýrgte bolǵan kezinde ol orys zııalylarymen, sonyń ishinde jazýshy Fedor Dostoevskıımen jaqyn baılanys ornatty.
Aıta keteıik, Prezıdent Qazaqstan–Reseı óńiraralyq yntymaqtastyq forýmyna qatysý úshin Ombyǵa bardy.
Prezıdent maıdanger Kemel Toqaevqa arnalǵan eskertkish taqtaǵa gúl shoǵyn qoıdy.
Memleket basshysy Reseı Prezıdenti Vladımır Pýtınmen kezdesti. Kezdesý barysynda memleketter basshylary ekijaqty kún tártibindegi aýqymdy máselelerdi talqylady. Qasym-Jomart Toqaev Vladımır Pýtınge Omby tórinde qonaqjaılyq tanytqany úshin alǵys aıtty.
Memleket basshysy Reseı men Ýkraına arasyndaǵy qaqtyǵysty retteý máselesine qatysty óz ustanymyn jetkizdi.
Odan keıin Memleket basshysy XXII Qazaqstan – Reseı óńiraralyq yntymaqtastyq forýmyna qatysty.
