Toqaev: PTR anyqtamasyz shetelden ushyp keletin jolaýshylar sany artty
NUR-SULTAN. QazAqparat – Qazaqstanǵa PTR anyqtamasyz keletin áýe kóligi jolaýshylarynyń sany 27 paıyzǵa artyp ketti. Bul týraly koronavırýs indetine qarsy is-qımyl jónindegi jıyn barysynda QR Prezıdenti Qasym-Jomart Toqaev aıtty, dep habarlaıdy QazAqparat tilshisi.
«Aqpan aıynan bastap PTR-zertteý nátıjesi joq áýe jolaýshylary sanynyń eki esege artqany baıqalady. Eger 2020 jyldyń qańtarynda Qazaqstanǵa PTR anyqtamasyz keletin tulǵalardyń úlesi 7,3 paıyzdy qurasa, qazirgi ýaqytta ol 27 paıyzǵa jetip otyr», - dedi Qazaqstan Prezıdenti.
Memleket basshysynyń atap ótýinshe, sonyń saldarynan elimizde koronavırýstyń mýtatsııaǵa ushyraǵan juqqyshtyǵy birshama joǵary úsh shtammy da anyqtalyp otyr.
«Juqtyrýdyń jalpy ósimi jaǵdaıy aýyr jáne óte aýyr patsıentterdiń kóbeıýimen, sonymen qatar ólim-jitim jaǵdaılarynyń ósimimen birge kele jatyr», - dedi Qasym-Jomart Toqaev.
