Toqaev preventıvti dıplomatııa tetigin iske qosýdy usyndy
BAKÝ. KAZINFORM — Qasym-Jomart Toqaev AÓSShK VII sammıtinde sóz sóılep, qaýipsizdik máselesi árqashan AÓSShK qyzmetiniń negizgi basymdyqtarynyń biri ekenin eske saldy, dep habarlaıdy Aqordanyń baspasóz qyzmeti.
— Bizdiń Uıym daý-damaıdy beıbit jolmen retteýge, qarýsyzdandyrýǵa jáne beıbitshilikti nyǵaıtýǵa aıtarlyqtaı úles qosa alady. Búginde munyń mańyzy arta tústi. Birikken Ulttar Uıymy, Shanhaı yntymaqtastyq uıymy, Táýelsiz Memleketter Dostastyǵy jáne basqa da halyqaralyq ınstıtýttarmen baılanys ornata otyryp, AÓSShK Azııa men odan tysqary aımaqtardaǵy qaıshylyqtardy eńserýde anaǵurlym belsendi ról atqarýǵa tıis. Osy oraıda, Keńeske múshe elderdiń ujymdyq saıası erik-jigerin nátıjeli bastamalarǵa jumyldyrýǵa shaqyramyz. Naqty qadam retinde Preventıvti dıplomatııa tetigin iske qosýdy usynamyz. Beıbitshilikti shıeleniske deıin ornyqtyrý kerek. Qaqtyǵystyń aldyn alý onyń saldaryn joıýǵa qaraǵanda anaǵurlym tıimdi ári arzanǵa túsedi. Mundaı tetik Uıymǵa múshe elderdiń sheshim qabyldaýǵa júıeli túrde atsalysýyna jáne málimdeme qabyldaýdan góri kelisilgen is-áreketke kóshýine múmkindik beredi, — dedi Qasym-Jomart Toqaev.
Memleket basshysynyń aıtýynsha, bolashaqqa baǵdarlanǵan Uıym búginde biz betpe-bet kelip otyrǵan túbegeıli ózgeristerge daıyn bolýy kerek.
— Jasandy nemese sýper ıntellekt qazirdiń ózinde ekonomıkalyq damý men ulttyq básekege qabilettilikti aıqyndaıtyn faktorǵa aınaldy. Kıbershabýyldar zamanaýı qaqtyǵystardy ýshyqtyrýda tótenshe ról atqarady. Budan bólek, jasandy ıntellektiniń baqylaýsyz damýy zor alańdaýshylyq týǵyzady. JI-diń múmkindigi molaıa túskenimen, ony halyqaralyq-quqyqtyq retteý tetikteri jetile qoımaǵan. Qazirdiń ózinde JI agentteriniń qorǵaý tetikterin aınalyp ótip, syrtqy júıelerge ruqsatsyz qol jetkizý faktileri tirkeldi. Eger halyqaralyq-quqyqtyq tetikterdi engizý arqyly osy úderisterdi toqtatpasaq, mundaı jaǵdaılardyń saldary aýyrlap, memleketter arasyndaǵy qaqtyǵys shıelenise túsýi yqtımal. Jasandy ıntellektiniń damýy adamzattyń ony tıimdi baqylaý qabiletinen asyp túspeýi kerek. Sondyqtan senimdi nyǵaıtý sharalary tsıfrlyq ortaǵa da tıesili. Menińshe, AÓSShK qolda bar bes ólshemdi altynshy, ıaǵnı jasandy ıntellektimen tolyqtyrýy kerek, — dedi Qazaqstan Prezıdenti.
Osyǵan deıin Prezıdent Qasym-Jomart Azııadaǵy ózara is-qımyl jáne senim sharalary jónindegi keńestiń 7-sammıtine qatysyp jatqanyn jazdyq.
