Prezıdent Germanııamen yqpaldastyqtyń mańyzdy salalaryn atady
ASTANA. KAZINFORM – Qasym-Jomart Toqaev pen Frank-Valter Shtaınmaıer Qazaqstan-Germanııa bıznes forýmyna qatysty. Bul týraly Aqordanyń baspasóz qyzmeti habarlady.
Prezıdent Qasym-Jomart Toqaev jáne Frank-Valter Shtaınmaıer Qazaqstan-Germanııa bıznes forýmynda sóz sóıledi. Basqosýǵa eki eldiń iskerlik top ókilderi qatysty.
Memleket basshysy Qazaqstan men Germanııa uzaq jyldar boıy ózara qurmet pen praktıkalyq yqpaldastyq negizinde berik baılanystardy jolǵa qoıǵanyn aıtty.
– Qazaqstan Germanııany ýaqyt tezinen ótken senimdi strategııalyq seriktes retinde qarastyrady. Biz Germanııanyń ekonomıkalyq jetistikterine jáne ónerkásip mádenıetine zor qurmetpen qaraımyz. Qansha býyn almassa da, «Made in Germany» brendi sapanyń, ınjenerlik kemeldiktiń, dáldik pen jaýapkershiliktiń sımvoly bolyp keledi. Germanııanyń ekonomıkasy qýatty elge aınalýyna onyń halyqaralyq korporatsııalary ǵana emes, sonymen qatar orta bıznes kásiporyndary (Mittelstand), bilikti kadrlary, ǵylymı áleýeti men biregeı óndiris mádenıeti úles qosty, – dedi Qasym-Jomart Toqaev.
Prezıdent Germanııa Qazaqstannyń Eýropalyq odaqpen qarym-qatynasynda aıryqsha ról atqaratynyna nazar aýdardy. EO – Qazaqstannyń eń iri saýda jáne ınvestıtsııalyq seriktesi, al Germanııa – elimizdiń Eýropamen ekonomıkalyq yqpaldastyǵyn órge súıreıtin qozǵaýshy kúsh ispettes.
– Búginde asa mańyzdy materıaldar, energetıka, kólik, aýyl sharýashylyǵy, tsıfrlandyrý, ozyq tehnologııa baǵyttary kún tártibimizdegi ózekti taqyryptar sanalady. Qazaqstan men Germanııa dál osy salalarda kúsh-jiger jumyldyryp, eleýli nátıjege qol jetkize alady, – dedi Memleket basshysy.
Aıta ketelik Qasym-Jomart Toqaev pen Frank-Valter Shtaınmaıer Birlesken deklaratsııa qabyldaǵan edi.
