Toqaev pen Shtaınmaıer qazaq-nemis joǵary oqý oryndary rektorlarynyń forýmyna qatysty
Memleket basshysy Astanaǵa arnaıy kelgen Germanııa Prezıdentine jáne nemis ýnıversıtetteriniń ókilderine alǵys aıtty.
Qasym-Jomart Toqaev bul sapar qazaq-nemis yntymaqtastyǵyn keńeıtýge múmkindik beretin elimizdiń bilim jáne ǵylym salasyndaǵy mańyzdy oqıǵa ekenin atap ótti.
– Ǵylym men tehnologııany qosa alǵanda, kóptegen saladaǵy baılanystarymyzdy nyǵaıtýǵa mol múmkindik bar. Qazaqstandy Eýrazııadaǵy zertteý habyna aınaldyrý – meniń armanym. Osy oraıda meniń armanymnyń júzege asýynda nemis ýnıversıtetteri mańyzdy ról atqarady. Al múmkindikter týraly aıtatyn bolsaq, árıne, biz ekonomıkalyq seriktestigimizdi nyǵaıtýǵa basa nazar aýdaramyz. Nemis ınvestorlarynyń bizdiń ekonomıkamyzdyń damýyna belsendi atsalysýyn joǵary baǵalaımyn. Qazaqstan Úkimeti bıznes-qoǵamdastyqtyń elimizdegi uzaq jáne qaýipsiz qyzmeti úshin qoldan kelgenniń bárin jasaıdy. Sizderdiń bıznestegi, ekonomıkadaǵy, sondaı-aq ǵylymı saladaǵy kásipterińiz tabysty bolýy úshin Qazaqstan Úkimeti qabyldaıtyn barlyq sharany talqyladyq, – dedi Qasym-Jomart Toqaev.
Prezıdenttiń aıtýynsha, Qazaqstan ǵylym men tehnologııany damytýǵa, qoldaýǵa, sondaı-aq otandyq joǵary oqý oryndarynyń áleýetin kúsheıtý máselelerine basa mán beredi.
– Men Memleket basshysy retinde bul máselege aıryqsha mán beremin. Aldymyzda uzaq jol tur. Degenmen jolymyzdaǵy barlyq kedergini sátti eńseretinimizge senimdimin. Sondyqtan bizdiń bul baǵyttaǵy mindetterimiz aıqyn. Osy maqsatqa qol jetkizý úshin Ǵylym jáne joǵary bilim mınıstrligine anaǵurlym belsendi bolýdy jáne bızneske baǵdarlanýdy tapsyrdym. Men joǵary tehnologııaǵa basymdyq berý qajet ekenin únemi aıtyp júremin. Elimizde sapaly bilim beretin ýnıversıtetter jetkilikti. Alaıda bizge sizderdiń tájirıbelerińiz kerek. Germanııa kóptegen eldiń tehnologııalyq damýyn ilgeriletýge septigin tıgizetin tehnologııa salasyndaǵy bilim berý isinde jetekshi el sanalady, – dedi Prezıdent.
