Toqaev pen Rýto Kenııa ónimderin Qazaqstan arqyly Eýrazııa elderine jetkizý máselesin talqylady
ASTANA. KAZINFORM — Qazaqstan-Kenııa iskerlik keńesi qurylýy múmkin. Bul týraly elimizge memlekettik saparmen kelgen Kenııa Respýblıkasynyń Prezıdenti Ýılıam Rýtomen kelissózderden keıin BAQ ókilderine málimdeme jasaǵan Memleket basshysy Qasym-Jomart Toqaev aıtty.
— Biz Kenııa ónimderin Qazaqstan arqyly Eýrazııa elderine jetkizý máselesin talqyladyq. Saýda-ekonomıkalyq yqpaldastyqty jańa deńgeıge kóterý qajet ekenin aıttyq. Qazaqstan-Kenııa iskerlik keńesin qurý týraly bastama kóterdik. Bul keńes naqty jobalardy ilgeriletýge, ózara alys-beristi arttyrýǵa múmkindik beredi. Men qurmetti meımanǵa kásipkerlerdiń úlken tobyn Astanaǵa ózimen birge alyp kelgeni úshin rızashylyǵymdy bildirdim. Kenııa elimizdiń e-government júıesindegi ǵarysh jáne aqparattyq tehnologııa salalaryndaǵy jetistigine qyzyǵýshylyq tanytyp otyr. Sapar aıasynda Rýto myrza Álem AІ halyqaralyq jasandy ıntellekt ortalyǵynyń jáne Qazaqstannyń Ulttyq ǵarysh ortalyǵynyń jumysymen tanysady, — dedi Prezıdent.
Memleket basshysynyń atap ótýinshe, kelissózder barysynda mádenıet, týrızm, bilim jáne ǵylym salalaryndaǵy baılanystarǵa da kóńil bólindi. Osy rette Kenııa tabıǵatty qorǵaý jáne bıoalýandyqty saqtaý máselesine aıryqsha mán beretine nazar aýdartqan Prezıdent bul ustanym elimizdegi «Taza Qazaqstan» ıdeologııasymen úndes ekenin erekshe atap ótti.
— Sondaı-aq búgin elordamyzda Qazaqstan-Kenııa bıznes forýmy ótip jatyr. Osy mańyzdy jıynǵa eki eldiń isker azamattary qatysýda. Bul is-shara qos taraptyń alys-berisin odan ary tereńdetýge múmkindik bereri sózsiz. Biz Úkimetterimizge jan-jaqty seriktestikti jandandyrý úshin naqty sharalar qabyldaý jóninde tapsyrmalar berýge ýaǵdalastyq, — dedi Qasym-Jomart Toqaev.
Buǵan deıin Memleket basshysy Qasym-Jomart Toqaevtyń elimizge memlekettik saparmen kelgen Kenııa Respýblıkasynyń Prezıdenti Ýılıam Rýtony Táýelsizdik saraıynda resmı qarsy alý rásimi ótken edi.
