Toqaev pen Oman Sultany AHQO-nyń ınvestıtsııalyq múmkindikterimen tanysty
ASTANA. KAZINFORM — Qasym-Jomart Toqaev pen elimizge saparmen kelgen Sultan Haısam ben Tarıq Ál Saıd «Astana» halyqaralyq qarjy ortalyǵyn aralap kórdi. Bul týraly Aqorda málim etti.
AHQO basqarýshysy Renat Bekturov mártebeli meımandarǵa ortalyq jumysynyń nátıjelerin tanystyrdy. Sonymen qatar Qazaqstan men Oman arasyndaǵy ınvestıtsııalyq-ekonomıkalyq qatynastardy odan ári jandandyrý úshin Ortalyq qandaı múmkindikter usyna alatynyna toqtaldy.
AHQO ashylǵannan beri Qazaqstanǵa 28 mıllıard dollardan astam ınvestıtsııa tartqan. Ortalyqta 90 elden 6600-den astam kompanııa tirkelgen.
Eki el basshylaryna aǵylshyn quqyǵyna negizdelgen qarjy ortalyǵy ıýrısdıktsııasyndaǵy erekshelikter, AHQO-nyń qarjy qyzmetin retteý komıtetteriniń, AHQO Soty jáne Halyqaralyq tórelik ortalyǵynyń qyzmeti týraly málimet berildi.
Budan bólek, Ortalyqtyń ıslamdyq qarjylandyrý salasyndaǵy múmkindikteri, sondaı-aq táýlik boıy konsýltatsııalyq qoldaý kórsetetin AIDA (AIFC Intelligent Digital Assistant) ıntellektýaldyq assıstenti jaıynda baıandaldy.
Aıta keteıik, búgin elordada Prezıdent Qasym-Jomart Toqaevtyń Qazaqstanǵa memlekettik saparmen kelgen Oman Sultany Haısam ben Tarıq Ál Saıdty qarsy alý rásimi ótti.
Keıin Prezıdent Qasym-Jomart Toqaev pen Oman Sultany Haısam ben Tarıq Ál Saıd shaǵyn quramda kelissóz júrgizdi.
