Toqaev pen Mırzıeevtiń beıresmı kezdesýi qazaq-ózbek baılanystaryna tyń serpin berdi

Іs-sharaǵa taldaý ortalyqtarynyń basshylary, qazaqstandyq dıplomattar, beldi sarapshylar men depýtattar qatysty. Olar taıaýda Buharada ótken Prezıdent Qasym-Jomart Toqaev pen Ózbekstan basshysy Shavkat Mırzıeev arasyndaǵy beıresmı kezdesýdiń nátıjesine ekpin túsire otyryp, keleshek yntymaqtastyq baǵyttaryn talqylady.

Basqosýda alǵash bolyp sóz alǵan Ortalyq Azııa halyqaralyq ınstıtýtynyń dırektory Javlon Vahabov qazaq-ózbek tandemi aımaqtaǵy ıntegratsııany ilgeriletetin kúshke ıe ekenin atap ótti.

– Qazaqstan men Ózbekstan arasyndaǵy baılanystar, ásirese, 2022 jyly jańa sıpat aldy. Bul jyly eki memleket «Odaqtastyq qatynastar týraly» kelisimge qol qoıdy. Qujat baýyrlas elderdiń yntymaqtastyǵyn buryn-sońdy bolmaǵan deńgeıge kóterdi. Sonymen qatar prezıdentterdiń Buhara qalasynda ótken beıresmı kezdesýi memleketterdiń osy seriktestikti jalǵastyrýǵa beıildigin taǵy bir márte rastady, - dedi Javlon Vahabov.

Munymen birge dóńgelek ústel barysynda QR Prezıdenti janyndaǵy Qazaqstannyń strategııalyq zertteýler ınstıtýty dırektory Jandos Shaımardanov baıandama jasady. Onyń aıtýynsha, qazir kórshiles elder uzaq merzimdi birlesken josparlar qurýǵa kiristi.

– Búginde Qazaqstan men Ózbekstan yntymaqtastyqtyń bir-eki jyldyq baǵdarlamasyn ázirleýge emes, aldaǵy onjyldyqtyń kún tártibin qalyptastyrýǵa bet aldy. Bul rette ekologııalyq máseleler asa ózekti. Ózbekstan «Taza aýa» jobasyn iske qosty, oǵan Qazaqstan qoldaý bildirdi. Bizdiń elimizde de osyǵan uqsas «Taza Qazaqstan» bastamasy bar. Kelesi aptada Astanada Óńirlik ekologııalyq sammıt ótedi. Onyń aıasynda Halyqaralyq Araldy qutqarý qorynyń otyrysy uıymdastyrylady. Tıisinshe, tóraǵalyq Qazaqstannan Ózbekstanǵa ótedi. ıAǵnı, sý qaýipsizdigi, klımattyq jáne ekologııalyq ózgerister eki memlekettiń kún tártibinde tur. Bul - bizdiń yntymaqtastyǵymyzdyń jan-jaqty jetilgenin aıǵaqtaıdy, - dep pikir bildirdi Jandos Shaımardanov.

Munymen birge is-shara aıasynda Kazinform tilshisine suhbat bergen OA halyqaralyq ınstıtýty dırektorynyń keńesshisi Saıdmýhtar Saıdkasymov Qasym-Jomart Toqaevtyń jumys sapary mańyzy men aýqymy jaǵynan memlekettik sapardan kem túspegenine toqtaldy.

– Kezdesý naqty máselelerdi, mindetterdi sheshýge arnaldy. Buǵan qosa, qarym-qatynastyń damý perspektıvalaryna da nazar aýdaryldy. Strategııalyq seriktestikti, odaqtastyq qatynastardy damytýǵa asa mańyz berildi. Sapardyń aýqymy memlekettik sapardan kem túspedi. Muny halyqaralyq qaýymdastyq kórdi. Endi sarapshylardyń basty maqsaty - josparlanǵan jobalar men baǵdarlamalardy sapaly oryndaýǵa járdemdesý. Eń aldymen, biz saıası-ekonomıkalyq baılanystardy damytýǵa ekpin túsirdik. Munymen birge mádenı-gýmanıtarlyq yntymaqtastyq ta basty nazarda. Salalardy sarapshylar tereń taldap, tıisti usynystar ázirledi, - dedi Kazinform tilshisiniń saýalyna jaýap bergen Saıdmýhtar Saıdkasymov.

Jıynda QR Syrtqy ister mınıstrligine qarasty Syrtqy saıası zertteýler ınstıtýtynyń aǵa sarapshysy Valerıı Sıtenko beldi sarapshylardyń pikirin negizge ala otyryp, Ortalyq Azııadaǵy yntymaqtastyqty júıeleý máselelerine toqtaldy.

– Qazirgi tańda Ortalyq Azııa halyqaralyq qoǵamdastyqtyń nazaryn ózine aýdaryp otyr. Buǵan álemde bolyp jatqan geosaıası ózgerister ıtermeleýde. Sonymen qatar Ortalyq Azııa saıası-ekonomıkalyq turǵydan joǵary áleýetke ıe. Osyǵan baılanysty beldi sarapshylar yntymaqtastyqty nyǵaıtýǵa negiz bolatyn 5 basymdyqty aıtyp júr. Birinshisi - memleket basshylarynyń sammıtti, parlamentaralyq baılanystar jáne «C5+» formatyndaǵy kelissózderden bastap, birlesken logıstıkalyq, ındýstrııalyq ortalyqtar qurýǵa deıingi protseste ortaq josparlardy qalyptastyrý. Ekinshisi - birtutas ekonomıkalyq keńistik qurý. Úshinshi basymdyq - kólik dálizderin damytý. Tórtinshi usynys – ózara kelisilgen syrtqy saıası baǵdardy ustaný. Osylardyń nátıjesinde Ortalyq Azııadaǵy biregeılik qalyptasýy tıis, - dedi Valerıı Sıtenko.

Іs-sharada kóterilgen bastamanyń biri - parlamentaralyq seriktestikti nyǵaıtý. Atap aıtqanda, eki eldiń yqpaldastyǵyn ilgeriletý, birlesken jobalardy jedel iske asyrý úshin quqyqtyq-normatıvtik bazany jetildirý oryndy.

– Búgingi tańda bizdiń parlamentterimiz normatıvtik-quqyqtyq bazany damytý arqyly ekijaqty baılanystardy tereńdetýge belsendi járdemdesip jatyr. Negizgi mindet - mınıstrlikter men vedomstvolar arasynda jasalyp jatqan ekijaqty kelisimderdiń oryndalýyna depýtattyq qadaǵalaý júrgizý. Aıta ketý kerek, memleket basshylary kezdesýleriniń qorytyndysy boıynsha Jol kartalary ázirlenedi. Onyń oryndalýyn baqylaý árdaıym parlamenttiń nazarynda bolýy tıis. Óz kezeginde biz bul mindetti minsiz atqarýǵa bar kúshimizdi salamyz, - deıdi Ózbekstan Zań shyǵarý palatasynyń depýtaty Dılorom Faızıeva.

Basqosýda sarapshylar halyqaralyq saýda dálizderin damytý máselesin de aınalyp ótpedi. Bul rette Ózbekstannyń Kólik mınıstrligine qarasty Kólik jáne logıstıkany damytý problemalaryn zertteý ortalyǵynyń dırektory Bekzod Holmatov is-qımyldardy sapaly úılestirýdiń mańyzyn aıtty.

– Qazirgi kórsetkishter bizdiń durys baǵytta kele jatqanymyzdy aıǵaqtap otyr. Alaıda, biz Transaýǵan jobasynan bastap, júk tasymalyn tolyq tsıfrlandyrýǵa deıingi strategııalyq jobalardy iske asyrý úshin is-qımyldardy júıeleýimiz qajet. Osy baǵyttaǵy ortaq kúsh-jigerimiz tutas óńirdiń uzaq merzimdi ekonomıkalyq órkendeýine negiz bolady, - dep málim etti Bekzod Holmatov.

Dóńgelek ústel sońynda qatysýshylar yntymaqtastyqty nyǵaıtýǵa baǵyttalǵan usynystardy ázirleý maqsatynda sarapshylar deńgeıinde kezdesýler uıymdastyryp turýǵa ýaǵdalasty.

Eske salaıyq, bıyl alǵashqy eki aıda Qazaqstan men Ózbekstan arasyndaǵy taýar aınalymy 830 mln dollardan asty.

Sonymen qatar taıaýda Tashkentte Qazaqstan men Ózbekstan Syrtqy ister mınıstrlikteriniń ózara yntymaqtastyq baǵdarlamasy qabyldandy.

Buǵan deıin habarlaǵanymyzdaı, Qazaqstan men Ózbekstan sý resýrstaryn ǵaryshtan baqylaý júıesin engizýdi talqylap jatyr.