Toqaev pen Korol Fılıpp Qazaqstan-Belgııa iskerlik keńesiniń tórtinshi otyrysyna qatysty
ASTANA. KAZINFORM — Memleket basshysy Qazaqstan-Belgııa iskerlik keńesiniń tórtinshi otyrysynda Korol Fılıpp pen Patshaıym Matıldaǵa iltıpat bildirdi, dep habarlaıdy Aqordanyń baspasóz qyzmeti.
Prezıdent mártebeli meımandardyń osy is-sharaǵa qatysýy tatý dostyq pen ekijaqty seriktestikti jańa ári sapaly deńgeıge shyǵarýǵa degen ortaq umtylysty kórsetetinin atap ótti.
Qasym-Jomart Toqaev Belgııa Qazaqstan ekonomıkasyndaǵy 10 iri ınvestordyń qataryna kiretinin aıtty. Sońǵy jıyrma jylda belgııalyq kompanııalar ekonomıkamyzǵa 15 mıllıard dollardan astam qarjy quıǵan.
— Elimizde agroónerkásip kesheni, densaýlyq saqtaý, farmatsevtıka, ozyq tehnologııalar men energetıka salalarynda 100-den astam belgııalyq jáne birlesken kásiporyn tabysty jumys isteıdi. Olardyń qatarynda Jan De Nul, Sarens jáne Ahlers sııaqty jetekshi belgııalyq kompanııalar bar. Ekijaqty saýda kóleminiń ósip kele jatqany qýantady. Bıylǵy 8 aıdyń qorytyndysy boıynsha eki el arasyndaǵy saýda-sattyq shamamen 10 paıyzǵa ósti. Sonymen qatar saýda úderisterin jeńildetý jáne taýar aınalymy ósimin arttyrý úshin áli de kóp jumys atqarýymyz qajet. Sonda ǵana halyqtarymyzdyń qalaýyna qol jetkizetinimizge senimdimin. Qazaqstan Belgııanyń Ortalyq Azııa aımaǵyndaǵy iri saýda seriktesi sanalady, — dedi Memleket basshysy.
Prezıdent ekijaqty saýda-ekonomıkalyq baılanystardy keńeıtýge Korol Fılıpptiń aıryqsha úles qosqanyna toqtaldy.
— Siz 16 jyl buryn Qazaqstanǵa saýda mıssııasyn bastap keldińiz. Bul qadam elderimizdiń isker toptary arasyndaǵy uzaqmerzimdi yqpaldastyqqa berik negiz qalady. Sizdiń Belgııa bıznesine kórsetip kele jatqan qoldaýyńyz seriktestigimizdi ilgeriletýge zor yqpal etti. Degenmen yntymaqtastyqty odan ári jandandyrýǵa áleýetimiz jetkilikti, — dedi Memleket basshysy.
Budan buryn Belgııalyqtar Koroli Fılıpp pen Patshaıym Matılda asyl tuqymdy arǵymaqtardy da tamashalaǵanyn jazǵan edik.
