Toqaev pen Qatar Ámiri ekijaqty seriktestikti nyǵaıtý máselesin talqylady
BAKÝ. KAZINFORM — Qasym-Jomart Toqaev Qatar Ámiri sheıh Támım ben Hamad Ál Tánımen kezdesti, dep habarlaıdy Aqordanyń baspasóz qyzmeti.
Bakýde uıymdastyrylǵan Azııadaǵy ózara is-qımyl jáne senim sharalary keńesiniń sammıti aıasynda Qazaqstan Prezıdenti Qasym-Jomart Toqaev Qatar Memleketiniń Ámiri sheıh Támım ben Hamad Ál Tánımen kezdesý ótkizdi.
Taraptar ekijaqty yntymaqtastyqtyń ózekti máselelerin talqylady. Qazaq-Qatar san qyrly seriktestigin nyǵaıtý, sondaı-aq birlesken ınvestıtsııalyq jáne energetıkalyq jobalardy júzege asyrý perspektıvasyna aıryqsha nazar aýdaryldy.
Memleketter basshylary halyqaralyq jáne óńirlik kún tártibi, sonyń ishinde Taıaý Shyǵystaǵy ahýal jóninde pikir almasty.
Osyǵan deıin Toqaev pen Álıev Transkaspıı talshyqty-optıkalyq baılanys jelisin iske qosý rásimine qatysqanyn jazǵan edik.
Eske salsaq, keshe Memleket basshysy Azııadaǵy ózara is-qımyl jáne senim sharalary jónindegi keńestiń 7-sammıtine qatysý úshin Baký qalasyna jumys saparymen bardy.
Qasym-Jomart Toqaev AÓSShK VII sammıtinde sóz sóıledi. Qazaqstan Prezıdenti qonaqjaılyq kórsetkeni jáne sammıtti joǵary deńgeıde uıymdastyrǵany úshin Ázerbaıjan Prezıdenti Ilham Álıevke alǵys aıtty.
