Toqaev pen Hýrelsúh Qazaqstan men Mońǵolııany jalǵaıtyn avtojol salýǵa kelisti
ASTANA. KAZINFORM — Qazaqstan men Mońǵolııa bir-birin jalǵaıtyn avtokólik jolyn salýǵa kelisti. Bul týraly Aqordada Mońǵolııa Prezıdenti Ýhnaagıın Hýrelsúhpen kelissózderden keıingi birlesken málimdeme barysynda Memleket basshysy Qasym-Jomart Toqaev aıtty.
— Biz ejelden tórde basy, tóskeıde maly qosylǵan, irgesi ajyramaǵan jurtpyz. Degenmen, elderimiz shekaralas emes. Sondyqtan kólik-tasymal salasyndaǵy yntymaqtastyǵymyz kórshilerimizge tikeleı baılanysty. Jol eki el arasyndaǵy ózara baılanys kózi, tyǵyz qarym-qatynas kepili ekeni belgili. Biz bul máseleniń asa ózekti ekenin jaqsy túsinip otyrmyz. Sondyqtan Hýrelsúh myrza ekeýimiz Qazaqstan men Mońǵolııa arasynda tóte jol ashýǵa múddeli ekenimizdi rastadyq. Kezdesý barysynda elderimizdi jalǵaıtyn avtokólik jolyn salý jóninde ortaq kelisimge qol jetkizdik, — dedi Qasym-Jomart Toqaev.
Prezıdenttiń aıtýynsha, bul jan-jaqty saraptap, muqııat zerdeleýdi qajet etetin kúrdeli másele.
— Desek te, eń bastysy jol qurylysy boıynsha maqsatymyz bir. Sol sebepti biz qurmetti Prezıdent myrzamen jasalǵan ýaǵdalastyqqa sáıkes, aldymen birlesken úkimetaralyq jumys tobyn qurý týraly sheshimge keldik. Atalǵan jumys toby osy másele boıynsha barlyq túıtkildi qaraıdy. Kórshiles eldermen kelissózder júrgizedi jáne jalpy jobanyń ýaqyty oryndalýyn qadaǵalaıdy. Aldaǵy ýaqytta Qazaqstan-Mońǵolııa avtojoly elderimizdiń arasyndaǵy saýda-sattyqty arttyrýǵa erekshe serpin beretini anyq. Bul joldyń ıgiligin irgeles elder de kóretin bolady, — dedi Memleket basshysy.
Qasym-Jomart Toqaev byltyr Qytaıda ótken Shanhaı yntymaqtastyq uıymynyń sammıtinde TransAltaı suhbat alańyn qurýdy usynǵanyn eske saldy.
— Altaıdyń 4 jaǵyn meken etken memleketterdiń saýda, kólik-logıstıka, týrızm, mádenıet salasyndaǵy máseleler boıynsha ortaq mámilege kelýine tolyq múmkindik bar. Osy rette 4 eldiń kólik-logıstıka áleýetin bir arnaǵa toǵystyryp, birlese jumys isteı alamyz. Bul qadam alys-beristi ǵana emes, Altaı biregeı týrıstik klasterin damytýǵa jol ashady, — dedi Prezıdent.
Buǵan deıin Qasym-Jomart Toqaev Aqordada Mońǵolııa Prezıdentin qarsy alǵanyn jazǵan edik.
