Toqaev pen Cho Chjon Shık Seýlde qazaq etnoaýylyn aralady
ASTANA. KAZINFORM — Memleket basshysy Qasym-Jomart Toqaev pen Koreıa Ulttyq Assambleıasynyń Spıkeri Cho Chjon Shık qazaq etnoaýylyna bardy.
Seýldiń Hangan saıabaǵynda ornalasqan etnoaýylda mártebeli meımandarǵa qazaq halqynyń tarıhy men salt-dástúri, ulttyq sándik-qoldanbaly óneri, án-kúıi men mádenı jádigerlerdiń zamanaýı úlgileri tanystyryldy.
Qasym-Jomart Toqaev pen Cho Chjon Shık kıiz úıdi aralap kórip, qazaq halqynyń biregeı muralary aıshyqtalǵan «Jeti qazyna» golografııalyq ınstallıatsııasyn tamashalady.
Etnoaýylda qazaq sheberleriniń qolynan shyqqan dástúrli zergerlik buıymdar, ulttyq kıimder men kıizden jasalǵan zattar kórmege qoıylǵan.
Meımandarǵa dombyra, daýylpaz, jetigen sekildi ulttyq aspaptardyń súıemeldeýimen oryndalǵan mýzykalyq baǵdarlama usynyldy.
«Birlik» bı ansambli men Qazaqstan Respýblıkasy akademııalyq koreı teatry balet trýppasynyń birlesken qoıylymdary kórermen kóńilinen shyqty. «Dostyq» horegrafııalyq kompozıtsııasy qos halyq arasyndaǵy birlikti, ózara qurmet pen tyǵyz baılanysty pash etti.
Qasym-Jomart Toqaev pen Cho Chjon Shıkke sadaq atý óneri men sadaqshylardyń sheberligi kórsetildi.
Dıdjıtal-kıiz úıde dástúrli qazaq baspanasynyń zamanǵa saı túrlengen kórinisi usynyldy. Panoramaly LED-ekran arqyly meımandar eki el halyqtarynyń dostyǵyna, Qazaqstandaǵy koreı etnosynyń tarıhy men mádenıetine, qazirgi turmys-tirshiligine qatysty beınekontentti tamashalady.
Etnoaýyl kórinisi qazaq-koreı qarym-qatynasynyń nyǵaıyp kele jatqanyn jáne eki el yqpaldastyǵyndaǵy mádenı-gýmanıtarlyq baılanystyń aıryqsha rólge ıe ekenin aıǵaqtady.
Hangan saıabaǵynda aspanǵa drondar kóterilip, eki eldiń memlekettik týlaryn beıneledi, sondaı-aq «Qazaqstan men Koreıa — jarqyn keleshek jolynda» jazýy ádiptelgen dırıjabl ushyryldy.
Eske salaıyq, munyń aldynda Qasym-Jomart Toqaev Koreıa parlamenti spıkerine eldegi saıası reformalar týraly aıtyp bergenin habarlaǵan edik.
